Godt og gale

Det seier styreleiar Pål Kårbø etter eit årleg møte på fylkesplan førre veke. Samstundes er Statens vegvesen på bana og håpar regjeringa vil opna for å samla alle bompengeprosjekt i Bergensregionen i ein pakke.

Den siste tanken kan forsvarast frå fleire synsstader. Vegvesenet sin ståstad er lett å forstå: Det kjem inn pengar som i tur og orden kan både oppgradera og byggja sårt tiltrengte nye vegar. Er ein felles pakke først vedteken, kan utbygginga skje utan politisk krangel og kiving mellom ulike pakker og regionar. Det beste argumentet for ei slik løysing er truleg Bompengeringen i Bergen. Den er nok framleis upopulær blant dei som «blør» mest. Men bergensarar som tiår etter tiår har sett stadig forbetringar i vegstandarden, seier i dag kanskje «pytt, pytt»: Me har i alle høve fått noko att for pengane.

Minuset er sjølvsagt, som vegvesenet truleg håpar, at ein felles bompengering aldri vert fjerna. Vegbyggjarane vil alltid ha klar nye prosjekt som dei meiner det er fornuftig å satsa på. Her i Nordhordland har bilistane gledd seg over å køyra snart ti år over Nordhordlandsbrua utan bompengar. Samstundes har strilane sett på at bergensarane har halt inn både bompengar og statlege kroner til både vegar og Bybane. Radværingar og andre har på si side humpa rundt på dei svingete og litt utvida kjerrevegane. Rett skal vera rett så har mykje skjedd på vegsektoren i Nordhordland. Å hevda at lokale politikarar har forsømt seg ved å ikkje halda bompenge-innkrevjinga i gang, vert etterpåklokskap. Det same vert hjartesukk over utarbeiding av vegpakker som har havarert. No er det berre å løfta blikket og semjast om å få noko gjort –
med bompengar.