Ikkje berre fotballbaner

Ungdommane kom med eigne syklar eller fekk låna sykkel og tryggleiksutstyr av klubben, og tok laust i ti minutt i gongen på den provisoriske bana laga til bak Austrheimhallen.

Austrheim Motorsport Club har planar om ei permanent løype, og det vert også jobba med bane i nabokommunen Lindås. I Meland er bana alt på plass, og Meland Motorsportklubb har faste treningar på bana innunder Eldsfjellet.

Mange ungdommar har lyst å prøva kjøring med cross-syklar, trialsyklar eller firehjuling.

Motorsport appellerer gjerne til ungdommar som ikkje er så opptekne av korpsmusikk eller fotball, to av dei dominerande fritidsaktivitetane. Idrettslaga i Nordhordland får eit stadig betre tilbod til sine fotballspelande medlemmer. Med ein imponerande dugnadsinnsats, og ofte med pengestøtte frå Trond Mohn og andre industribedrifter, er det i dag kunstgrasbaner i alle dei største kommunane.

Nettopp i Austrheim er arbeidet i full gang med ei ny kunstgrasbane, som vert ein del av Austrheim idrettspark.

Motorsportklubbane har hatt ein trong fødsel for fleire av sine baner. Særleg er det problematikken kring arealbruk og støy som bremsar planane. Både i forhold til naboar, dyrelivet og folk som brukar naturen til rekreasjon, vil støyen vera ei ulempe.

Samstundes må det i ein region som vår, med god plass mellom grendene, vera plass til å driva også med denne typen aktivitetar. Eit tips kan vera at klubbane, og kommunane, ser på dette over kommunegrensene. Med syklar som ikkje er registrerte for kjøring på veg, må ungdommane uansett transporterast eit stykke til trening og løp. Om bana då ligg ti minutt unna i heimkommunen, eller ein halvtime unna i nabokommunen, er ikkje så avgjerande.

Langsiktig planlegging er viktig, sidan det etter kvart kan verta naudsynt med investeringar i både baneanlegg og klubblokale.

Med samarbeidsprosjekt på tvers av kommunegrensene trur me det er mogleg å einast om lokalitetar der støy ikkje vil gje problem korkje i dag eller i framtida.