Julekort og helsingar

Dermed er sjansen stor for at nettopp din husstand er mottakar av ei slik helsing, anten det no er eit bilde av dei søte små eller nokre linjer om året som gjekk, og påført dei beste ønskjer for jula og det nye året. Samstundes som papirkortet heldt stand, er det mange som har bytta ut penn og papir med tastatur, og brukar e-post til å senda sine helsingar. Er du ute i siste liten på julekvelden, kan mobilen vera siste redning, dersom det er nokon du berre må senda ei julemelding til.

Skikken med å senda julekort har lange tradisjonar her i landet, heilt tilbake til slutten av 1800-talet. I dagens Strilen kan du sjå og lesa om gamle julekort og brev som er samla på Fjellsende. Kanskje vil folk om hundre år lesa om korta du har fått i dag, og slik sjå kva som opptek nordmenn kring juletider i 2011.  
For mange er nok julekorta like viktig som gåvene ved juletida. Og gjerne eit handskrive kort, som har ei personleg helsing. I ei tid der det vert lettare og lettare å masseprodusera, får dei tinga som må gjerast langsamt og for hand, meir verdi.

Større verdi enn den handskrivne julehelsinga har nok også telefonoppringinga, invitasjonen eller besøket. Sjølvsagt er det ikkje noko krav at ein må feira høgtida i lag med familie eller venner. Men for dei som ufrivillig må vera aleine slike dagar, vert det gjerne ekstra sårt og synleg når mange samlast til sine middagsbesøk og julefeiringar.
Så sjølv om jula i år ikkje inneber så mange fridagar frå arbeid, er det kanskje likevel tid til ei telefonhelsing eller eit kaffibesøk? Eit dykk ned i julekortbunken fører deg kanskje til ein namn på nokon du ikkje har snakka med på lenge. Eller kanskje det tvert om er nokon du saknar i bunken, ein ekstra god grunn til å ringa, og kanskje invitera over på kaffi ein fridag. Det kan kanskje vera den beste gåva du gjev dette året.

God jul til alle våre
lesarar og annonsørar.
Frå alle oss i Strilen