Krev og PR-midlar

Om laget ikkje skal avviklast, må det skje noko heilt nytt, seier styreleiar Kristin Handeland.

Eit både aktivt og omdiskutert lokalt samarbeid ser ikkje ut til å ha livets rett. Som organisert reiselivssatsing var det på høg tid at eit lokalt lag vart starta opp for 25 år sidan. Litt stygt sagt kom satsinga lovleg seint, når ein veit at både Hardanger og Sogn i lang tid har marknadsført seg som reisemål, med suksess. Likevel trur me regionen skal vera glad for den innsatsen Nordhordland Reiselivslag har gjort. Gledeleg er det også at regionen får ein ny næringshage for reiseliv, kultur og oppleving.

Også Gulen og Solund skal vera med i ei felles satsing. Spørsmålet er om dette vil gje god nok marknadsføring av Nordhordland som reise-mål. Vårt råd er at både kommunane og dei lokale reiselivsbedriftene tenkjer seg om to gonger før dei let det eksisterande reiselivslaget svelta i hel.

Spørsmålet er nemleg kven som skal driva rein marknadsføring av regionen. Den nye næringshagen skal ikkje driva med dette. Pengane til å driva den nye næringshagen skal koma mellom anna frå SIVA og Hordaland fylkeskommune, offentlege kroner som vil koma i alle fall i 10 år. Det meste av dei vil truleg gå til lønningar. Med dei rette folka kan ein næringshage for reiseliv, kultur og oppleving både styrkja eksisterande bedrifter og opplevingar, og tilføra oss nye.

Men aktuelle besøkjande må også lokkast hit gjennom annonser og brosjyrer som fortel at me har ein like fantastisk region som sogningane og hardingane. Det kostar pengar, og så langt har både kommunar og medlemsbedrifter vore svært gnitne.

I andre regionar har ein forstått at høgare eigeninnsats, medlemskontingent, må til. Slik det no ligg an, kan det vera fare for at ein stadig betre region å besøkja, vert for dårleg marknadsført om reiselivslaget vert avvikla.

Det er ein stor risiko å ta.