Krev tillit og kustus

Ein grunn er at rektoren på Matre har bestemt at alle mobilane til elevane på ungdomstrinnet skal samlast inn ved starten av skuledagen. Det fell ikkje i god jord hjå lærarane, som må ta jobben med å samla inn og dela ut att telefonane.

Ein ringerunde Strilen har gjort, viser ulik praksis lokalt. At skulane får ha sine eigne reglar, høyrest greitt ut sett frå ein nærdemokratisk ståstad. Men det er mange skular her i landet, og ulik praksis er kanskje ikkje så lurt. Kor lurt det er at Kunnskapsdeparte­men­tet fastsett ein praksis som skal gjelda for alle skular, er me litt usikre på. Me er tilhengjar av at skulen er ein stad der kustus og det å læra skal ha høgt fokus. Likevel synest me det vert å gå litt for langt å bruka tid på å samla inn og dela ut mobiltelefonar.

Det vanskelege er å finna enkle reglar som kan handhevast. Diverre trur me ikkje at alle ungdomsskuleelevar er vaksne nok til å få tillit til å få avgjera fritt korleis mobilen skal brukast. Problemet då vert at ein del vil bruka tid unødvendig på mobilen og gå glipp av undervisning.  Sjølv om mange mobilar i dag også har internett, tilgang til e-post og andre nyttige funksjonar, er me redd reglane må vera klare.

At «ulovleg» bruk resulterer i at foreldra må henta mobilen, høyrest greitt ut. Som oftast er det dei som betalar rekninga.

Henting av sonen eller dottera sin mobil kan gje ein sunn og nødvendig diskusjon. Konklusjonen på den må verta at den yngre garde må respektera og overhalda dei reglane skulane set. Då er det ein stor fordel at skulane i same regionen praktiserer like reglar. I media har det nyleg kome fram at like reglar på tvers av skulane gjer borna tryggare.

Om skulane ikkje klarer å finna fram til desse reglane, må kanskje Kunnskapsdepartementet eller foreldra ta denne jobben.