Like for lova

Saka på Radøy er ikkje eineståande, korkje i kommunen eller i regionen elles. I dette tilfellet er det eit gamalt naust som er rive og erstatta med ein feriebustad, utan at arbeidet er omsøkt til kommunen. Tilfellet vart oppdaga då kommunen sine folk skulle taksera alle bygg i samband med innføring av eigedomsskatt. Også andre stader i regionen vår er liknande tilfelle oppdaga, til dømes eit ulovleg hytteanlegg i Lindås.
I den nye plan- og bygningslova, som tok til å gjelda i sommar, er det ei innstramming i kommunane si plikt til å handheva desse reglane. Ikkje alle kommunar er like glade for dette pålegget, som gjev dei eit slags etterforskings- og straffeansvar som ein elles gjerne tenkjer høyrer til politiet. Men når det først er gjeldande lov, er det viktig at kommunane følgjer opp. Reglane må handhevast, for å unngå at dei som ikkje søker slepp unna, medan dei som søker får nei frå kommunen. Det er også viktig at handhevinga er lik frå kommune til kommune, slik at lova er lik på begge sider av sundet. For det er ofte ved sund og fjord at dette er aktuelt. Nordhordland og Gulen er eit område med mange hytter i sjøkanten, med tilhøyrande bryggeanlegg og flytebrygger. Ein inspeksjonsrunde rundt om i fjordane ville nok gjeve kommunane ein del ekstra saker å jobba med.

Samstundes som kommunane har eit ansvar for å sjå at reglane vert etterlevd, må politikarar og administrasjon også gjera sitt til å unngå etablering av ulovlege tiltak. I dag er det nok sjeldan at hytter dukkar opp «av det blå», som i tilfellet på Sletta, men flytebrygger og kai utan søknad er det nok fleire av. Når ein ser på kva ein båtplass og eit naust i dag vert omsett for, er det tydeleg at det er trong for fleire fellesanlegg. Når kommunane skal handheva lovverket og sjå til at det ikkje vert etablert ulovlege anlegg, er det ein føremon at det finnest alternativ ein kan visa til. Småbåthamner er dessutan mindre arealkrevjande enn enkeltbryggjer, ved at ein enkelt lokalitet kan erstatta 20-30 småbryggjer rundt om. I planarbeidet bør kommunane peika ut stader som kan vera aktuelle for større anlegg. Gjerne i eit samarbeid på tvers av kommunegrensene.