Når mange seier nei

Korleis kommunestyret stiller seg, kan og påverka om naboane i sør, i Gulen kommune, får vindmøller eller ikkje.

Så langt er det berre Solund i vårt nærområde som har vald å ha folkerøysting om det omdiskuterte temaet. Me ser ingen grunn til å kritisera Solund for det. Vindmøller har dei fleste innbyggjarar ei meining om. Men i utgangspunktet meiner me politikarane må vera rette instans til å gje sitt råd. Det har Gulen lagt opp til, og i si tid var det og eit fleirtal i Fedje kommunestyre som sa nei til vindmøller der. Det rådet følgde NVE og sa nei til ein konkret søknad. Om Solund kommunestyre følgjer den rådgjevande folkeavrøystinga, kan dei som ønskjer vindkraft i Gulen, få eit ekstra argument. Motsett kan Solund-ja minska sjansane for dei som vil tena pengar på vindkraft på sørsida av Sognefjorden. Som utgangspunkt meiner me det uansett må vera rett at NVE legg stor vekt på kva fleirtalet i dei berørte kommunestyra seier.

Når Solund sitt svar kan påverka Gulen, skuldast det at NVE ser området under eitt når dei behandlar søknadene. Det ser også Direktoratet for Naturforvaltning i Trondheim ut til å gjera. Dei legg naturleg nok stor vekt på naturinngrep og det dei kallar «konfliktpotensial». Det må aldri undervurderast, og me støttar direktoratet i at «det er mange fleire planlagte anlegg enn det som er realistisk å byggja». At direktoratet vil skåna Solund og samla fleire anlegg i Gulen, er eit råd me overlet til lokalpolitikarane å vurdera. Men heile tida å seia nei til ein fornybar ressurs som eit klart fleirtal av Stortinget er positiv til, vert feil. Langs kysten er det og planar som vert ønskt velkomen lokalt. Om politikarane i Solund og Gulen seier ja til nokre av søkjarane, er me ikkje sikre på at innbyggjarane i ettertid vil kritisera dei sterkt for det.