Når siste vedtak gjeld

I andre runde av reguleringsplanen har eit klart fleirtal i planutvalet snudd og forlangar mindre fortetting. Walde Bygg og Lindås Tomteselskap skal etter ein reguleringsplan byggja mange hundre bueiningar i Knarvik Aust. Mange millionar er alt lagde ned i vegar og annan infrastruktur, som var på plass i fjor haust.

Ser ein ut over Knarvik i dag, ser ein mange forretningsbygg på eit par etasjar som har kome eitt om gongen opp gjennom åra. I gjeldande kommunedelplan står det at Knarvik skal utviklast til ein «funksjonell, triveleg by». Einebustader i ein reguleringsplan frå 2003 er fjerna, til fordel for fortetting med leilegheitsblokker opp til fem etasjar og rekkjehus, i ein ny plan med oppstart i 2008.

Det har utbyggjarane bygd sine planar på, i tiltru til at politikarane ikkje ville skifta meining. Skal det no inn einebustader, og blokker må reduserast til fire etasjar, forstår me godt at utbyggjarane fortvilar og meiner spelereglane er endra undervegs. Dei har grunn til å etterlysa det bokmålske ordet forutsigbarhet frå politikarane si side. Kommunen må elles finna nok plass til leikeareal, elles stoppar ei motsegn frå Fylkesmannen planen.

Framlegget som fleirtalet i planutvalet sa nei til for eit år sidan, men no støttar, skuldast blant anna at folk i Knarvik forlangar nye einebustadtomter.  Reguleringsplanen som det no er bede om vert vesentleg endra, var eigentleg sett på saklista til kommunestyret 11. mars. Men der kjem saka etter utsendt sakliste ikkje opp.

Eller burde ho det? Kjem ho ikkje opp, er det førebels ingen som får vita kva kommunestyret måtte meina om einebustader og høgde på bustadblokker i Knarvik. Eller skal me kanskje få vita det i møtet 22. april. Før sommaren? Eller etter? Det kan vel og ha litt med høflegheit å gjera at kommunen spør kva utbyggjarane meiner.

Utnyttingsgrad har i alle fall i høgste grad å gjera med økonomi. Alle forstår at med høg utnytting vil utbyggjarane truleg tena meir pengar. Blant utbyggjarane er også kommunen sitt heileigde Lindås Tomteselskap, som har bunde mange millionar kroner i vegar, vatn og kloakk i Knarvik Aust. Det same har Walde Bygg.

Sistnemnde driv i ein byggebransje der marginane ikkje er dei aller feitaste. I Knarvik Aust skal det investerast vel ein halv milliard i bustader dei neste åra.

Lindås må vedta ein plan og unngå å koma meir på etterskot, og vidare unngå at utbygginga vert ein økonomisk risikosport for dei som skal satsa.