Naturleg å spørja

Det var spørsmålet Høgre-politikar Nils Træland i Lindås tok opp i Strilen laurdag. Og i så fall kan ein bruka litt ekstra tid på å få til sjøkabel i staden for høge master gjennom Hardanger-naturen? spør Træland vidare. Han viser og til at ein sjøkabel over Fensfjorden i over tre tiår har forsynt Mongstad-raffineriet med ein del av krafta som trengst der. 

Kraftlinja gjennom Hardanger har fått mange politikarar på bana, både lokale støttespelarar for regjeringa og politikarar frå andre parti. «Jens kommer til å gi etter» er tittelen på ei overskrift i VG laurdag. Landets største laussalsavis konkluderer altså med at Ap kjem til å snu til fordel for sjøkabel i staden for dei såkalla «monstermastene» gjennom fleire Hardanger-kommunar. Me er litt usikre på den konklusjonen, men status i følgje NRK er at Stoltenberg reiser til Hardanger, ikkje berre fleire av stadrådane. Dermed får blant anna Ap sin ordførar i  Granvin, som rasar mot godkjenninga av luftspenn, møta regjeringssjefen på heimebane. Ap får på eiga hand ta sine avklaringar og vurderingar – også opp mot dårlege meiningsmålingar på Vestlandet. Om straum i ei krise kan leverast frå gasskraftverket på Mongstad – via eksisterande linjenett – bør BKK uansett utfordrast på. Spørsmålet er også stillt av fleire lokale ordførarar. Svaret skal vera at det eksisterande nettet sørover i Lindås ikkje har nok kapasitet. Me stussar litt på det svaret i og med at denne linja er god nok til å føra store mengder straum i andre retninga – til Mongstad.

Gasskraftverket på Mongstad går førebels på redusert produksjon. Spørsmålet om det i periodar kan forsyna Bergen med straum må BKK eller andre faginstansar kunna gje politikarane eit svar dei kan stola på. Spørsmålet er heilt naturleg å stilla. I går kom det også eit nytt moment inn i debatten: Statoil har sendt konsesjonssøknad til NVE for å forsyna Troll A med kraft via sjøkabel. Uansett utfall i Hardanger, er det eit moment som kan spela inn i framdrifta av – kanskje også behovet for – kraftlinja Kollsnes-Mongstad. Faktisk informasjon – blant anna om siste tilgjengelege teknologi for sjøkablar, er avgjerande å få fram. Det siste ser ut til å vera ein av grunnane til dei kraftige reaksjonane NVE og regjeringa får på konklusjonen om at luftspenn er det einaste som er samfunnsøkonomisk realistisk.