Nokon må ofra seg

Ordførar Jon Askeland fekk støtte frå dei andre for å ta storkommunetanken opp i regionrådet. Ikkje alle var like begeistra for ein storkommune, men det var brei støtte for å starta ei utgreiing.

På Nordhordland Rotary sitt møte uttalte fleire ordførarar seg positivt for ein storkommune. Møtet viste at den sitjande politiske leiinga i dei tre største kommunane er positive, eller i alle høve ikkje negative. Me trur også det er mykje rett i det ein av representantane i Radøy formannskap sa:

– Radøy, Lindås og Meland bør starta ein prosess, så få dei andre litt press på seg.

I eit nyleg innlegg vart alle kommunane utfordra til å tenkja etter kva dei kan bidra med i ein storkommune. Det ser me som eit klokt råd. Sjølv trur me svaret vert at fleire enn dei tre store – Lindås/Meland/Radøy – har mykje å bidra med.

Når samanslåing no er på veg mot regionrådet, er det for det første litt «tilbake til start». Regionrådet har før vore gjennom utgreiingar som kommunestyra har drøfta og sagt si meining om. Men i åra etterpå har gløden for å ta det endelege steget ikkje vore sterk nok til å henta saka fram att frå skrivebordsskuffene.

Har det kanskje å gjera med at sitjande toppolitikarar og administrative leiarar sit godt i sine posisjonar?

Denne gongen kjem opptakten frå ein regional organisasjon som tydelegvis undrar seg over kvifor ikkje samanslåing vert drøfta meir seriøst – slik det vert gjort blant anna i Sunnhordland.

Det er difor både eit tankekors og ikkje heilt oppmuntrande at opptakten kom frå Rotary og ikkje frå nokon av ordførarane. Men heldigvis har i alle fall Radøy reagert kjapt og vert med på ein prosess.

Kanskje bør regionrådet seia at det er nok om Lindås, Meland og Radøy tek ein første runde med utgreiingar. Så treng ikkje dei andre kommunane bruka tid og krefter på saka før dei ser korleis kjemien stemmer mellom dei tre største. Det er gjerne den mest rasjonelle måten å angripa saka på denne gongen.

Sjølv om mange har tru på ein «Nordhordland kommune», er nok ein del framleis avventande. Difor trur me ein faktor ville hjelpa dei som ser regionen som ein kommune – at ein noverande ordførar går i bresjen for fulle segl.

Om ingen tar sjansen på å ofra seg no, kan det kanskje koma ein eller ei som vert vald neste haust!