Nye fokus

På jobben har ein gjerne som mål å gjera det «litt betre». Privat kan det vera ei oppussing av kjøkkenet som står på programmet, eller ein skal verta «litt flinkare» å besøkja slektningar som er oppe i åra. Samvitet kan fort verta sett på prøve når ein ser på kva naboen får tid til. Difor kan det av og til vera godt å minna seg sjølv om at ein gjer så godt ein kan.

Årsskiftet er eit vanleg tidspunkt å setja seg nye mål, både jobbmessig og privat. Men det kan og vera lurt å ta seg tid til ein pustepause, både ved årsskiftet og elles, og tenkja etter om det bør gjerast endringar. Det store tyske konsernet Volkswagen har kome til at dei tilsette skal vera fri frå å lesa jobb-epost om kvelden – og stengjer tilgangen til e–posten ein halvtime etter endt arbeidstid. Me synest dette er eit sunt og positivt signal. Kvar og ein får avgjera kor tilgjengeleg ein skal vera i jobbsamanheng, men er det rett å bruka fritid på å svara på e-postar som har kome på jobben? Svaret på det er vel enkelt nok. Difor imøteser me ein debatt om dette og gjerne tydelegare «kjørereglar». Av og til må det kanskje setjast grenser for kor mykje ekstra ein skal yta for arbeidsgjevaren sin!

Ved sida av jobb og fritid må samfunnet og det offentlege livet gå sin gang. Lokalt er det no mange ferske politikarar som skal gjera ein jobb. Enkelte har litt overraskande fått tillit avdi partiet deira gjorde eit hopp framover. Andre har fått plass i kommunestyra ut frå at dei har litt ekstra ambisjonar og interesse for å vera med og styra sin kommune. Uansett har alle ein viktig jobb å gjera. På same måten som privat, set også kommunar seg mål gjennom grundig debatterte planar og budsjett. Den nye samhandlingsreforma skal fungera, noko mange ventar spent på å sjå korleis vil skje i praksis. Lokal industri og mange andre har håp om at Nyborgtunnelen skal opnast om vel seks år. Sjølv om politikarane har fått sine fullmakter for fire nye år, er det både lov og høgst avgjerande å påverka dei. Det er viktig å gje dei impulsar og og idéar, også i nye saker som dukkar opp og krev eit vedtak. Det håpar me i Strilen å bidra til gjennom ein open og frisk debatt.