Prøv båten

Vår region hadde også snøggbåt i 15 år frå 1979 til 1994, då opninga av Nordhordlandsbrua tok bort grunnlaget.

Så er spørsmålet om grunnlaget no er godt nok for eit tilbod som inntil vidare kostar vesentleg meir enn å ta bussen. Talket på reisande dei første dagane var ikkje oppløftande. Åtte-ti passasjerar frå Knarvik og like mange frå Frekhaug på dei første avgangane, gjev naturleg nok for små billettinntekter til å driva særleg lenge. Samstundes var stemninga god blant dei som tok imot tilbodet og kjøpte seg månadskort til 1800 kroner.

BNR sitt mannskap ytte god service, og leiinga vurderer grep som skal gjera det enklare  å bruka båten, blant anna til­bringar­buss. «Hardangerprins» med plass til 97 passasjerar sikrar ei behageleg reise på under halvtimen mellom Knarvik og Bergen, endå litt kortare for Frekhaug-passasjerane. Så langt synest me at BNR har stillt opp 100 prosent av det ein kan forventa av selskapet.

Også første dagen gjekk diskusjonen vidare om Hordaland fylkeskommune sin vilje til å utvida det lokale kollektiv-tilbodet. Pål Kårbø frå KrF har difor all grunn til å utfordra partia som vender tommelen ned for eit felles periodekort for båt/buss 250 kroner dyrare enn dagens busskort til 760 kroner. Det forslaget avviste fylkesutvalet 29. november. Men Kårbø og KrF har dekning for forslaget ved å setja av 3,5 millionar kroner i 2012-budsjettet.

Det kan ein av dei største lokale tilhengjarane av snøggbåt, ordførar Nils Marton Aadland frå Høgre, støtta som fylkestingsrepre­sen­tant i budsjettmøtet 13. desember. Men han kan og verta «pålagt» å stemma nei for å sikra fleirtal for H/Frp/Venstre sitt budsjett. Der er det nemleg ingen fylkeskommunale kroner til drift av snøggbåt, trass fagre ord om dette i valkampen frå fleire parti.

Dersom fleirtalet skulle snu, trur me det er ei fornuftig investering som kan sikra at båten vert meir enn eit blaff. Me ser for oss at det vil auka talet på kollektivreisande, slik at Skyss sine bussruter ikkje får særleg stor nedgang. Men då er det fleire pendlarar og andre som må ta utfordringa og parkera bilen i Knarvik eller på Frekhaug.  Me ser dei økonomiske motargumenta i høve til å reisa med buss.

Men me trur og dei som prøver båten, vil sjå at det er ein behageleg reisemåte dei vil satsa på anten dagleg eller av og til, og som dermed bør ha livets rett.