Samarbeid på prøve

Skuleplanen som Lindås kommunestyre snart skal vedta, viser at samarbeidet mellom Kristeleg Folkeparti, Framstegspartiet og Høgre er i ferd med å slå sprekker. Frp går inn for å støtta rådmannen sitt framlegg om å leggja ned fire barneskular. Også eit mindretal i Høgre vil leggja ned skular, medan KrF er samd med fleire av partia utanfor fleirtalet, som ikkje vil leggja ned skular. Ulike oppfatningar om skulane gjer også at fleirtalspartia så langt ikkje har klart å samla seg om budsjett for 2010 og økonomiplan vidare.

Eit fleirtal av politikarane ser så langt ut til å gje grønt lys for tre store prosjekt med oppstart i 2010: Kyrkje i Knarvik, idrettshall på Lindås og ny skule på Seim. Sluttrekninga kan hamna på kring 200 millionar kroner.  Så vert spørsmålet om nedlegging av skular vil endra behovet for investeringar. Alt tyder på at det vert lagt ned skular, truleg to eller fire. Og rådmannen sitt økonomiske råd er å satsa på ei rask utbygging av mottakande skular for å gje elevane eit mest mogleg likeverdig tilbod. Rådmannen vil venta med andre nye store prosjekt som kyrkje i Knarvik og idrettshall på Lindås. Lindås kommune står seg godt økonomisk og kan visa til pluss 40 millionar i resultat to år på rad. Men lånegjelda på veg mot 1 milliard kroner. Med aukande rente er vårt råd at Lindås-politikarane må tenkja grundig gjennom om dei kan vera i ferd med å ta seg vatn over hovudet.

Så langt har det vore brei semje i den ferske koalisjonen mellom KrF, Frp og Høgre. Total usemje om noko så viktig som skulestrukturen set naturleg nok samarbeidet på ei hard prøve. Men eitt av partia, Frp, vil også privatisera ei avdeling ved Knarvik Sjukeheim. Ein slik politikk kan møta kraftig motstand blant anna i KrF, samstundes som både fleirtalet i Høgre og heile KrF har sterke kjensler for dagens skular. Dermed er det usemje på to svært viktige politikkområde: Skule, og pleie og omsorg. Det er ikkje det beste grunnlaget for eit samarbeid som skal vara i fire år eller kanskje vidare. Det er lett å seia at Frp/KrF/Høgre vil samla seg om eit felles budsjett når skuleplanen er avklart 26. november. Det vert lettare om skuleplanen vert avklart med eit klart fleirtal, men per i dag er me usikre på om det vil skje. Og ulike syn mellom dei tre samarbeidande partia kan koma til å setja samarbeidet på nye prøvar.