Skryt må ikkje undervurderast

Påstanden kom frå ein konsulent i Markup Consulting. Konsulenten viste til at fleire og fleire regionar set fokus på korleis dei skal marknadsføra seg. Stavangerområdet har til dømes nådd gjennom som «Energiregionen».

Samlinga denne veka har som mål at Mongstad skal vera ein spydspiss for Nordhordland sitt om­dømme. Etter ei kartlegging, skal arbeidet gå vidare med nye møte. Me trur ei slik kartlegging er viktig, og me trur at Mongstad er eit svært viktig element i ei god mark­nads­føring av Nordhordland. Då må ein også vera litt sjølvkritisk.

Austrheim sin nye ordførar, fram til no Statoil-tilsett, er misnøgd med korleis media framstiller ulike delar av næringslivet på Mongstad. Media er ofte ei god skyteskive, men då håpar me at den kartlegginga som vert gjort, og kan få fram kvifor Mongstad frå tid til anna vert negativt framstilt. Har ein det rette svaret på det, er det og lettare å gjera noko med det, eventuelt rydda bort feiloppfatningar og vrangførestillingar.

Når ordføraren seier at raffineriet og oljeterminalen vert drifta heilt i verdsklasse, bør me ikkje gløyma forbetringsprogrammet Statoil Mongstad held på med. Store summar skal sparast inn for å verta meir konkurransedyktig, og det må gjerast med krum hals. Samstundes må ein frå fram, som informasjonsleiaren ved Statoil påpeikar, at det er kunnskapsbedrifter som er samla på Mongstad.

Etter vårt syn bør me ikkje ta som utgangspunkt at Mongstad og resten av Nordhordland har eit dårleg omdømme. Fleire og fleire flytter til regionen og trivest her. Som innbyggjarar bør me vera ambassadørar for regionen ved å skryta av det me meiner er positivt med Nordhordland. Verdien av skryt skal ikkje undervurderast.

Samstundes må me vera så ærlege å vedgå at me også treng ei god oppskrift på å løfta om­dømmet endå eit hakk. Positive ordførarar eller styre­leiarar i lokale bedrifter kan ikkje klubba for eit godt omdømme. Det må jobbast for.

Difor må alle som kan koma med positive innspel til det arbeidet Austrheim og Lindås har starta opp saman med ­Industriutvikling Vest AS.