Snøen er kvit for alle

Sjølv om ein lang vinter har gitt sjåførar god glattkøyringstrening, oppstår det fort trafikale problem når snøen lavar ned og brøytemannskapa ikkje er kjappe nok. Måndag ettermiddag var det kaos på vegane, med dødsulukke i Os, front-mot-front-kollisjon ved Bjørsvik og saktegåande trafikk i Knarvik og omegn. Medan nokre seinkar farten etter forholda, har andre det travelt. Uansett er vegen kvit for alle. Om du sjølv kjenner deg sikker på at underlaget ikkje byr på problem, er det slett ikkje sikkert at sjåføren i bilen føre deg er det. Tenk over om dei to minuttane du sparar på å køyra forbi, er verd risikoen. Tel til ti før du kjeftar på andre som har køyrd seg fast i snøen eller av andre grunnar seinkar deg. Ta omsyn til andre i trafikken, også du som køyrer svært forsiktig. Set på blinklyset og slepp dei ivrigaste forbi på ein trygg måte.

Brøytemannskapa har det travelt for tida. Me har stadig lesarar på tråden som klagar på dårleg brøyting, både på vegar og fortau. I Knarvik er det slett ikkje lett å komma seg fram. Pågåande vegarbeid har sender fotgjengarane ut i bilvegen, og uforsvarleg glatte fortau finst det mange av. Aller helst har nok fortaua forsvunne under snøen. Og med brøytekantar så høge som lastebilar, vert omvegane både lange og farlege for dei som ikkje vel å klatra med snø til låra.

Spesielt går tankane til dei som er avhengige av hjelpemiddel for å gå ute. Ein rullestol kjem ikkje langt på dette føret. Ei barnevogn vert ei stor utfordring å få med seg. Og enkelte med rullator har kanskje ikkje våga seg ut sidan før jul. Dei aller fleste klarar seg fint, men fordi nokre har behov for ekstra bistand i snøen og kulden, har mellom anna Lindås kommune ekstra beredskap. Om du kjenner nokon som kunne trenga hjelp, ring kommunen og gje dei tips.

Me har ei oppfordring til alle strilar - sjå rundt deg. Har du det eigentleg så ille? Kan du gje andre ei hjelpande hand? Hjelp til å grava fram ein bil, spa ut nokon sin oppkjørsel eller ring bestemor og ta ho med ut. Snøen er kvit for alle. Men kos kan fort verta kaos.