Store løft

Både Ap og Frp hadde eigne framlegg både for drift og investeringar. Uansett får rådmannen det stort sett som han vil. Det gjer han i ein kommune med god økonomi, inntil vidare blant anna på grunn av forutsigbare og store inntekter frå eigedomsskatten på Mongstad. Lindås gjer ferdig påbyrja skuleanlegg på Lindås og Leiknes inkludert storstove og byggjer nye Seim skule. Det siste er ei satsing på ikkje mindre enn 90 millionar kroner.

I tillegg skal ein gje Eikanger skule eit første byggjesteg på ny skule. Det Lindås vil realisera i tråd med tidlegare vedtak, er etter vår vurdering slik ein forutsigbar kommune skal drivast. Og ser ein på storleiken på tala, gjer Lindås eit imponerande løft på skulesektoren, og vil truleg rydda plass også for ei kyrkje i Knarvik som vert dyrare enn rekna med.

Spørsmålet ein må stilla seg, er om pleie og omsorg kjem på etterskot.

Når tonen mellom KrF/Høgre/Sp/Venstre og dei to andre partia ikkje er like fredfull som for eit år sidan, er forklaringa klar nok: Omkampen som kom om ein skulebruksplan det var gjort eit «lovleg» fatta fleirtalsvedtak på. Siste vedtak gjeld alltid, men forutsigbarheten får då ein knekk, slik som tonen mellom Ap, Frp og fleirtalspartia har gjort.

Det som etter kvart må avklarast, er framtida for skulane Festo og Kløvheim. Dei vil fleirtalet «koma attende til», og det bør skje kvikt. Standarden på desse skulane, om dei skal leva vidare, og på Skodvin og gamledelen av Alversund-skulen må og avklarast.

Lindås har detaljerte tal frå 2007 på kva ei opprusting av skulane vil kosta. Politikarane har no prioriert kva bygder som skal få nye og gode skular. Dei fleste forstår er at heller ikkje Lindås kan investera over evne, og at nokon må venta på tur.

Av og til må ein til og med seia nei, slik fleirtalet gjorde til å laga skytebane på den nye Seim-skulen.

Men politikarane bør og prøva å seia frå om kor tid alle elevar i Lindås skal få like gode skular, eller om prisen for å ha ein grenda­skule er at den aldri får ein like god standard som dei andre skulane.