Viktig for lita bygd

Molo med veg på toppen vil nemleg gje tilgang til attraktivt byggjeland, som det er manko på i kraftbygda ved E39.

Ein del av del av debatten den førre perioden har gått på om molo vil truga drifta ved Havbruksstasjonen, ein av dei viktige arbeidsplassane ved sida av BKK. Difor er det gjort undersøkingar på korleis ein molo kan påverka både vatn og straum- og istilhøve.

Breva frå Havbrukstasjonen har vore nokså kritiske, men no er konklusjonen at Havbruksstasjonen ikkje skal ha noko å frykta. Då går me ut frå at både bygdefolk og dei nye politikarane vil stilla seg positive til moloen. Det folkemøtet politikarane legg opp til i januar, bør få dei fastbuande til å stilla både med spørsmål og andre innspel.

Ein ny plan for Matre omfattar også ei ferdig-gjering av E39 gjennom den litt inneklemde bygda. Det og andre vegutbetringar og fortau er viktig. Likevel er det nye bustadtomter som må ha høgaste prioritet, også avdi nye forskrifter for rastruga område innskrenkar arealet som kan byggjast på.

I siste kommunestyre vart det ein debatt om kor mange tomter det i første omgang er lurt å få inn på ein reguleringsplan. Administrasjonen meiner det mest taktiske er 12 tomter i første runde, medan ein del politikarar synest det høyrest  litt lite ut. I ei lita bygd som Matre vil 12 tomter vara i fleire år. Men ein skal heller ikkje undervurdera interessa når Masfjorden kan lokka med slike einebustadtomter på ei fin øy.

Me går ut frå at vert Matresøya først landfast, vert dette bygda sitt viktigaste byggjeland dei neste 60-70 åra. Då kan det kanskje vera naturleg å visa på kartet litt fleire enn 12 nye tomter. Og i ein kommune som Masfjorden trur me det er lurt å tilby tomter på kring eit mål. I dei sentrale delane av Nordhordland vert det vanskelegare og vanskelegare å oppdriva nye einebustadtomter av slik storleik. Det kan Masfjorden og andre kommunar skåra på å tilby.