Viktig signal

Førre veke hadde Lindås festivitas på rådhuset med opning av ny publikums-ekspedisjon. Området der besøkjande vert møtt, har fått ei ansiktsløfting til kring 250.000 kroner. Omlegginga har sikra ein plass der folk som har byggjesaker, kvar dag skal finna folk som kan svara på spørsmål. Ein PC er og tilgjengeleg om ein til dømes kan fylla ut eit skjema via internett.

Lindås har som kjend satsa på eit svært ambisiøst slagord - ein stad «der draumar blir røyndom». I det målet inngår fleire verdiord, blant anna tenestevillig og inkluderande. I nokså lang tid har mange ikkje fått dette inntrykket i samband med byggjesaker. Grunnen er at kommunen hamna kraftig på etterskot og fekk bunkar med byggjesaker som ikkje vart behandla etter kvart. Å skjerma saksbehandlarar var nok eit lite velkome tiltak hjå dei som hadde spørsmål dei trong avklara. Å halda fram med det når byggjesakskøen stort sett er borte, ville vore eit dårleg signal utad. Me håpar at nyordninga vil fungera godt.

Reint fysisk er det ikkje snakk om noko stort område Lindås brukar til å ta imot publikum. Ein har tilpassa seg i eit rådhus som dreg litt på åra. Det er også eit rådhus som ikkje er stort nok til heile administrasjonen, slik at ein del tenester må publikum oppsøkja i leigde lokale, til dømes i Knarvik Senter.

Dersom Lindås gjer alvor av å utvida rådhuset, går me ut frå at det vert avsett litt meir areal til publikumsområde. Det har også å gjera med at lokalet der publikum skal hjelpast, må vera såpass romsleg at dei tilsette føler seg vel til å gjera ein god jobb.

Om ikkje publikum som møter opp i ekspedisjonen får hjelp der, går me ut frå at dei om muleg kan verta henviste til andre tilsette som kan gje konkrete svar. Stor pågang frå innbyggjarane kan verka stressande for tilsette som sit med søknader og saker å behandla ferdige. Men det er rett prioritert å bruka meir ressursar på å møta publikum på ein hyggeleg og effektiv måte. Vårt tips er at Lindås og tenkjer på å bruka heimesida si litt meir aktivt – slik nokre av nabokommunane gjer i større grad.