– Dramatisk lite vegmidlar

– Hordaland fylkesting skal vedta handlingsprogrammet for 2010-2013 på ei samling 9. og 10. mars, og eg vil sterkt oppmoda tingrepresentantar i alle parti frå denne regionen om å sikra meir pengar til vegane i nordfylket. Vår region kjem dramatisk dårleg ut. Dette seier eg både som ordførar og som medlem i samferdsleutvalet til Nordhord­land Region­råd.
På fylkeskommunalt plan har handlingsprogrammet vore til handsaming både i samferdsleutvalet og fylkesutvalet, og herifrå føreligg det samrøystes tilrådingar.

Noko kan gjerast
– Det er framleis ikkje for seint å gjera noko med prioriteringane, og ikkje minst gjeld det på nokre spesielle programområde for fylket utanom Bergen. Dette handlar om meir opne sekkepostar til trafikksikring, gang- og sykkelvegar, kollektivtransport, såkalla miljø- og servicetiltak, mindre utbetringar og planleggingstiltak.

Av desse midlane får Nord­hordland ikkje ei krone til gang- og sykkelvegar eller til miljø- og servicetiltak som eksempelvis kan vera rasteplassar eller tiltak mot støy. Nokre småbeløp er sette av til trafikksikring og kollektivtiltak i Lindås kommune. På ein post for mindre utbetringar er det sett av tre millionar kroner til Stordalen-vegen i Masfjorden.

Har ingen vegpakke
Askeland seier at Nordhordland på vegområdet heilt klart er ramma av at regionen enno ikkje har klart å einast om eit utbyggingsprogram med delvis bruk av bompengemidlar, som Nord­hordlandspakken, medan andre område har slike pakkeløysingar klare. Difor vert dei prioriterte.

For eksempel har kommunane i nordre del av Hardanger fått på plass den såkalla Kvam­ma­pakken, det finst ein Bømlo­pakke, og Bergens­pro­grammet med Bybanen har ein heilt spesiell storleik. Alle slike program beitar godt på totalmengda av midlar i fylket.

– Den situasjonen me har kome opp i, viser berre behovet for at me vert samstemde om Nordhordlandspakken. Det er elles ikkje noko nytt at nordhordlandskommunane kjem dårleg ut på vegområdet.

Altfor låg prosent
Jon Askeland seier at Nordhord­land har rundt 20 prosent av den folkemengda i Hordaland som finst utanom Bergen. Like fullt får regionen berre ni prosent av midlane til dei opne sekkepostane for ulike typar trafikktiltak.

– Men desse løyvingane er vel temmelig spikra no som dei har vore gjennom alle andre politiske organ?

– Det er aldri for seint å påverka desse prioriteringane, slik at me kan få ei meir rett fordeling av vegmidlane. Politikarane har alltid det siste ordet, seier Radøy-ordføraren.