– Viktig å finna ut kva ein kan verta betre på

Den genierklærte idrettstrenaren, TV-kommentatoren, diplomøkonomen og rådgjevaren snakka fredag til ei forsamling av lokale næringslivsfolk som hadde møtt fram på Frekhaug. Her vart det arrangert møte med kjendisen i reig av Nordhordland Hand­verk- og Industrilag og Nordea.

Betringsfaktorar  
Kaggestad har ein heil sentral bodskap om at individ og organisasjonar må finna fram til noko dei kan verta betre på, gjera noko med desse einskildfaktorane, og faktisk måla den framgangen dei gjer. Det skapar i seg sjølv begeistring, når ein kan registrera at det går framover.

Betring kan skje på det mentale plan hos den einskilde, i funksjonane mellom medarbeidarane, og innanfor dei arbeidsspesifikke oppgåvene.

Ikkje spesielle
Ein sentral bodskap frå Kaggestad er at folk i ulike organisasjonar må slutta å tru på at dei er så spesielle at ei oppskrift som er nytta andre stader ikkje vil fungera hos dei. Ut­fordr­ing­ane er i stor grad dei same over alt. Iallfall finst det langt fleire felles problemstillingar enn forhold som skil.

SAS nemnte Johan Kaggestad som eit eksempel på at ressursane må setjast inn på faktorar som ein kan gjera noko med. Det nyttar ikkje å gå rundt og klaga over dårlege rammevilkår eller hard konkurranse, som Kaggestad har opplevd at folk i SAS-leiinga gjorde i altfor stor grad. Ein sutregjeng, kalla han dei. Ein må heller satsa på å forbetra seg sjølv, og gjera ting mest muleg rett.

Kva gjer dei beste?
– Korleis gjer dei det, dei aktørane som er best i ein bransje? Dette er noko som folk i all konkurrerande verksemd må spørja seg om. Og dei som gjer det godt, må heile tida vera på utkikk etter noko som kan gjera dei betre. Dei må vera audmjuke og nysgjerrige, og ha klart for seg at det alltid vil vera nokon der ute som ønskjer å ta rotta på dei, sa Kaggestad.

Han har mest fartstid frå idretten, og har engasjert seg mykje i aktivitetar på Topp­idretts­senteret. Ifølgje Kaggestad er mesteparten av idrettsfolka som vankar der, ikkje toppidrettsfolk i eigentleg forstand. Dei er berre med.

Trenar ikkje nok
– I Skandinavia har vi innanfor toppidretten eit fokus som er meir menneskeorientert og mindre resultatorientert enn elles i verda. Derfor manglar våre utøvarar ofte nok mot og vilje til å utfordra, og dei trenar heller ikkje nok.

Kaggestad nemnte vår internasjonalt berømte klaverspelar Leif Ove Andsnes som eksempel på ein person som trenar veldig mykje, og er meir fokusert enn våre toppidrettsfolk. Rundt 80 prosent av treninga hans er fysisk basistrening, medan berre 20 prosent er spesifikk konserttrening.

– Dei beste roarane våre har trena kolossalt mykje. Dei har hatt ein god strategi for eiga utvikling, og den har vore basert på kunnskap om korleis ein sikrar kvalitet.

Ikkje mål-fokus
Kaggestad sa at folk i næringslivet ikkje minst må ro i same retninga. Det inneber at alle har den same forståinga av kor ein skal. Altså må alle ha eit klart mål om noko som skal oppnåast.

– Det er viktig å ikkje fokusera på sjølve målet, men derimot på korleis ein kan nå eit mål, og dei mulegheitene ein har for å komma dit. Ein kjem i mål som ein konsekvens av nøyaktig gjen­nomføring av heilt konkrete tiltaksplanar. Undervegs til målet må ein jamt måla prestasjonane.

Johan Kaggestad hadde også ein del å seia om rolla til leiaren i eit slikt utviklingsløp. Det er leiaren sitt ansvar å utvikla åtferda og potensialet til dei einskilde medarbeidarane, men då må han ikkje ha altfor mange å halda styr på.

Han må også bruka tid til å vera saman med dei tilsette, for å kunne motivera dei og få dei til å sjå sine mulegheiter. Vert leiaren for fjern, klarar han ikkje lenger å vera nokon leiar.