22 husvære ved Hordasmia

– Dette vert det største prosjektet til no for vårt firma, etter at me kjøpte arealet i 2005. Heile utbygginga kjem på mellom 30 og 40 millionar kroner, seier dagleg leiar Geir J. Reigstad i Reigstad Bygg og Eiendom.

Det lokale firmaet var starta i 2000 og er lokalisert i Gjervik.

Utbygginga vert delt opp i to trinn, det første med 10 treromsleilegheiter på 60 rutemeter.

I 2011 er planen å starta opp med trinn II, som vert 12 leilegheiter på 80 rutemeter, fordelt på ein åttemannsbustad og ein firemannsbustad.

I ei pressemelding vert det opplyst at husa vert i vestlandsk stil med tradisjonelle materialval – for å halda seg til byggjestilen som er i området elles.

Friareal og leikeareal vert lagt vestvendt, og prosjektet får asfalterte vegar og p-plassar.

– Reigstad Bygg er først ute med å leggja ut denne typen leilegheiter i området no. Det ser me som ein fordel, og tidspunktet bør vera gunstig i og med at renta ser ut til å halda seg låg også ei tid framover, uttaler Geir Reigstad.

Grunnarbeida skal etter planen starta opp i første halvdelen av mars.

– Prisane vil liggja mellom kr 1.580.000 og 1.680.000 i trinn ein. Dei første leilegheitene skal vera innflyttingsklare om nokså nøyaktig eit år, seier Reigstad.