– Har ikkje tenkt å skifta forbund

– Tidlegare var det vanleg praksis at politifolk som «rykka opp» til lensmann, melde seg over i det som før heitte Norsk Lensmannslag. Men dei siste åra har ikkje ein slik overgang vore så automatisk, seier Ivar Holmaas.
Han har vore lensmann i til saman fire år, frå nyttår for det nye Masfjorden, Gulen og Solund lensmannsdistrikt.

Med på aksjon
– Politiets Fellesforbund har eg vore medlem av sidan eg vart aspirant i 1984, seier Holmaas.
– Og då var du med alle dei andre politifolka på kontoret som la ned arbeidet halvannan time i den nylege streiken?
– Ja, det er rett. Ein drog til Bergen og var med på fellesaksjonen der. Eg sjølv var att i området og følte det ikkje ubekvemt å delta i streiken eg var tatt ut i. Ein beredskap for å ivareta samfunnet sine interesser var på plass og avtalt med Hordaland politidistrikt, seier Holmaas.

– Tek ansvaret
Han viser til at det etter kvart er ein del lensmenn rundt om i landet som held fram som medlemer i Fellesfor­bundet.
– Sjølv har eg forståing for frustrasjonen som rår i høve til prosessen rundt arbeidstidsavtalen blant dei menige politifolka. Men som representant for arbeidsgjevar må eg ta ansvaret med å få drifta av kontoret til å gå rundt, seier Holmaas.
Han peikar på at fleire fagforbund enn Politiets Felles­forbund har medlemer over eit breidt spekter.
– Dette er ei utfordring som fleire organisasjonar må takla. Frå dei menige her ved kontoret har eg ikkje oppfatta signal om at eg bør melda overgang til laget som organiserer lensmenn og leiarar. Og eg har ingen umiddelbare planar om å gjera det, seier Ivar Holmaas.
– Og du har ikkje følt problem ved at din lojalitet no må liggja på arbeidsgjevar­sida?
– Nei, det har eg ikkje. Me har ulike roller, og det føler eg at alle respekterer.