Ankar hytteriving

Han opplyser torsdag, ikkje overraskande, at Lindås-politikarane sitt krav om riving vert anka.

– Me er framleis i sjokk. Dette tek veldig hardt på, seier hytteeigaren i Bergen, som førebels ikkje ønskjer å stå fram med namn.

I tillegg til kjøpesummen på kring 1,4 millionar kroner, opplyser eigaren å ha lagt ned kring 1,5 millionar i oppussing og innlegging av straum.
Alt må rivast, vedtok Planutvalet 24. februar.

Sterk støtte
– Eg har nesten ikkje fått tid til anna enn å ta imot støtteerklæringar frå kjende og andre. Eg har stadig måtta lada mobiltelefonen, seier hytteeigaren.

Han og kona har engasjert advokat som vil ta tak i saka over helga.

Eigarane hadde rekna med at dei to anneksa måtta rivast, men vart svært forbausa då politikarane gjekk imot administrasjonen og vil riva også hovudhytta bygd for kring 40 år sidan, samt kai.

– Mot rettsoppfatning
Byggmeister Morten Nytun, som bistår kjøparen som ansvarleg søkjar, seier  han har vanskar med å sjå kommunen sitt grunnlag for å lukka delar av møtet.

– Dessutan trur eg det må vera feil saksbehandling at kommunen har tatt stilling til saka som dispensasjon. Det var innvilga for hytte og naust i 1969 og må vera eit gyldig vedtak. Men eg er byggmeister, ikkje jurist. Elles er det tydeleg at vedtaket om riving strir mot mange si rettsoppfatning, seier Nytun.

– Gjeld mange
Nytun viser til at det er svært mange som har sendt inn kommentarar til BT sin artikkel på bt.no.

– Blant anna vert det vist til at drap vert forelda etter 25 år, påpeikar Nytun.

Nytun trur kommunane kan få store vanskar med ei handheving som Lindås legg opp til, ut frå at det står mange hytter utan papira i orden.

– Kommunane og fylkesmannen bør på prinsipielt grunnlag setja ein strek for kor langt tilbake i tid ein skal gå. Står kommunane faste på riving, kan det og koma rettssaker ein risikerer å tapa, seier Nytun.

Han trur og den mykje omtalte saka i Lindås vil få hytter med ferdigattest til å stiga kraftig i verdi.