Asfalt for millionar

– Me er godt i gang og brukar i år fem millionar kroner, slik som avsett på budsjettet, opplyser avdelingsleiar Arne Eikefet.
Torsdag var det innleigde firmaet i gang med Gaulen-vegen. Frå før har Hagesæter, Hilland-vegen i Alverstraumen og delar av vegen til Reikerås fått nytt dekke.

Historisk løft
Strekningane som står for tur i denne runden, er Skårnes, Keilegavlen, Storokse, Hjelmtveit og Kopperdal.
– Tidlegare år har asfalteringa lagt på om lag ein million kroner i året, nokre år ingenting. I fjor asfalterte me for historisk høge 6,5 millionar kroner, derav 3,5 millionar i reasfaltering takka vera den statlege tiltakspakka. Neste år er det i økonomiplanen sett av tre millionar kroner. Så får me sjå kva budsjettprosessen i haust konkluderer med, seier Eikefet.
– Kva strekningar må venta?
– Det er ei strekning på rundt 50 kilometer rundt om, i tillegg til mange strekningar med gammalt og dårleg dekke som burde vore reasfaltert.

Grusfritt i 2018?
– Kor lang tid tar det så før kommunen er à jour med å fornya dekket på dei kommunale vegane?
– Med dagens økonomiplan og vidare kopiering av denne, får me asfalt på grusvegane i løpet av om lag åtte år. Men me har eit stort etterslep og forfall på dei gamle asfalt- og oljegrusvegane. Her burde det vore brukt minst fire millionar kvart einaste år i tillegg til dei førebels tre som er avsett til asfaltering. Ønsket er altså minst sju millionar årleg til asfalt fram til og med 2018.
–  Kva skjer med Isdal-vegen og asfalt/eventuelt fjerning av dekke?
–  Me har førebels ikkje hatt kapasitet til å gå laus på denne, men her ligg det politiske vedtak på at delar av vegen skal tilbakeførast til grusdekke og det skal han sjølvsagt få, seier Arne Eikefet