Bil og båt totalskadde i brann

Det var natt til måndag avisbodet oppdaga at det brann i firmabilen til Roger Evensen like nordom Kårbø. Varebilen stod parkert i hagen inntil ein liten plasthall der Evensen hadde ei 22 fots plastsnekke med overbygg ståande. Frå hallen og til husveggen var det knapt fem meter.

Spylte huset
– Hadde vinden blåse mot huset, kunne det gått heilt gale, seier Linda-Kristin. Då avisbodet fekk vekt dei to vaksne og tre borna som låg og sov, var bilen og hallen alt overtent og det blæs godt. Difor var det første dei gjorde å spyla huset med hageslangen slik at ikkje brannen skulle spreia seg dit. Deretter kjørte dei vekk privatbilen, som også stod parkert i tunet.

Hissig brann
– Det tok si tid før brannfolka kom sidan dei ikkje har brannfolk med utstyr her i Meland. Men dei gjorde så godt dei kunne då dei først kom, seier Linda-Kristin. Brannen var sløkt klokka fem.
Ho meiner det er liten tvil om at brannen starta i bilen, sidan hallen var heilt blotta for presenning på den sida. Dessutan var det ingen brennbare ting i hallen. Alt slikt var plukka ut av båten og låg inne i kjellaren sidan båten skulle pussast opp, fortel ho. Men kvifor det skulle ta til å brenna i ein to år gamal bil, forstår ho ikkje.
– Bilen hadde ikkje vore i gang sidan laurdag, seier ho. Under brannen høyrde ho eit par smell, men kva det var vil dei først finna ut under etterforskinga.

Vil takka avisbodet
No vil ho og mannen prøva å få tak i namnet på avisbodet for å få takka han for at han for innsatsen.
– Dersom han ikkje hadde slått alarm, er det ikkje godt å seia korleis det hadde gått, seier ho.