Bosseksporten gjev berre liten prisauke

– Me hadde frykta ein stor auke, men det vert ikkje så gale. Litt raskt utrekna vil forskjellen på forbrenning kontra deponi utgjera kring 150 kroner i året, med moms, per abonnent, seier Erlend Kleiveland, dagleg leiar i NGIR.

Renovasjonsavgifta for 2011 skal handsamast i NGIR sitt representantskap i oktober. Og når avgifta skal fastsetjast er det også andre ting som vil telja med enn den prisauken ein veit om så langt. Til dømes vil avfallsmengde og transportkostnader påverka prisen.

– Det er dyrare å senda avfallet til Sverige enn å deponera. Men det gjev ikkje så store prisutslag sidan svenskane var billegare enn dei norske anlegga, seier Kleiveland.

Krav om miljø
NGIR har ikkje nokon avtale direkte med forbrenningsanlegga, men med den norske avfallsmeklaren Rekom. I dag går mesteparten til Sverige, men noko også til norske anlegg.

– Me har sett ein del krav til dei anlegga som det skal leverast til, dei skal mellom anna ha ein viss miljøstandard. Dei to anlegga i Sverige som mesteparten av avfallet skal leverast til, har svært høg miljøstandard og utnyttar om lag 95 prosent av energien i avfallet.

Dersom transporten til Sverige går med vogntog som elles ville gått austover tomme, slår det positivt ut i miljøvurderinga. Det er dessutan betre økonomi for NGIR og dermed abonnentane, sidan ein slepp betala diesel og sjåfør begge vegar.

– Endringar i dieselprisen er elles ein av fleire ting som vil endra prisen på kontrakten. Prisen vert regulert opp mot fleire indeksar, der drivstoff er ein av fleire.

Sender to vogntog
Leveringa starta rett etter påske, og det går per i dag to vogntog dagleg frå Kjevikdalen, der omlastinga skjer utandørs inne på anlegget.

– Me har søkt Lindås kommune om å få byggja ein omlastingsterminal, seier Kleiveland.

Den søknaden skal handsamast politisk over sommaren.

NGIR har ikkje merka noko endring i resirkuleringsgraden etter at dei byrja å senda restavfallet til forbrenning.

– Me har ikkje merka noko på sorteringsgraden, og vil at folk skal sortera minst like godt som før, seier Kleiveland.

Det NGIR derimot merka var lite avfall i vinter, og dess meir i april og mai, noko som nok skuldast at hageryddinga vart utsett med all snøen som låg dei første månadene i 2010.