Byggjer ei bru, neste må venta

– For fotgjengarbrua ved Alversund skule har me eit problem, der har det ikkje kome inn anbod som me kan godta, seier prosjektleiar Arnljot Jordal i Statens Vegvesen.
Dermed vert det ny anbodsutlysing i september. Den siste planen er at brua skal vera på plass til skulestart i 2011, eit halvt år seinare enn tidlegare tenkt.
Mange entreprenørar viste først interesse for å ta jobben, men det kom ikkje inn tilbod som vegvesenet kunne godta.

Ti millionar
– I mellomtida kan me gjera noko meir detaljprosjektering, så det vert ikkje berre ei forseinking, seier Jordal.
Brua skal betalast med ti millionar kroner som Lindås
kommune fekk frå tiltakspakken mot finanskrisa.
Denne løysinga for fotgjengarsikring ved Alversund skule var elles mykje omstridt, før Lindås kommune til slutt gjekk inn for at det skulle byggjast bru, heller enn å grava og laga undergang.

Bru i sør
Arbeidet er derimot i gang i den søre enden av Alverflaten, der det skal komma ei fotgjengarbru over den siste fornyinga av vegen Alverflaten-Isdal. Sjølve brufundamenta kunne ein sjå konturane av alt då Mesta laga den nye vegen, no er same entreprenør på plass igjen for å gjera alt heilt ferdig.
– Gangbrua skal vera på plass og klar til bruk før jul, medan heile prosjektet har tid fram til ferien neste år, seier Jordal.

Omfattande
Prosjektet omfattar ein god del meir enn berre brua og gangvegar opp dit. Det skal lagast gangveg frå oppsida av brua og inn på Lindås tomteselskap sitt nye industriområde, det skal komma gangveg heilt ned til Bikuben-tomta, busslommer skal oppgraderast, og det skal lagast ein kulvert for Isdal-elva. Vidare skal det gjerast arbeid på vass- og avlaupsnettet til Lindås kommune, og ein del trafikksikringsarbeid på strekninga Isdal-Alversundbrua, mellom anna heving av noko rekkverk og utbetring av rekkverksavslutningar.
– Heile dette prosjektet har ei ramme på seksten millionar kroner, seier Arnljot Jordal.