Der alle vinn banketten

Endeleg kom helga tolv av fotballspelarane frå NBK har venta på og gledd seg til eit heilt år. Frå fredag til søndag samla 1300 deltakarar seg til den tjuande landsturneringa i handball og fotball for psykisk utviklingshemma i Bergen.

Rekorddeltaking
Til turneringa hadde heile 91 lag meld seg på, derav 57 i fotball der Nordhordland ballklubb deltok. Laurdag spelte dei heile tre kampar på rekkje og rad, og søndag ein. Men sjølve kampane var berre halvparten av moroa.

Parade og grillfest
Under landsturneringane vert det alltid lagt stor vekt på det sosiale fellesskapet. Her møter ein att gamle kjende og får mange nye vener.
Fredag vart turneringa opna med show og ordførar på Torgalmenningen, parademarsj til Grieghallen og grillfest på Edvard Griegs Plass.

Larsen- og Nielsen-show
Laurdag kveld var det bankett i Grieghallen etterfølgt av show og dans med Rune Larsen og Helge Nielsen. Og der vann alle suverent!
Med seg hadde fotballspelarane våre ti medhjelparar, og dei kunne heia eller delta på fagseminar om kosthald og aktivitet, og idrett utan grenser.

5’ar fotball
Nytt av året var at alle spelar 5’ar fotball for å skapa betre differensiering og ei meir positiv idrettsoppleving, skriv fotballpresident Yngve Hallén i programbladet.
Det er Hordaland Fotballkrets og Noregs Håndballforbund Region Vest som er ansvarlege for planlegginga og gjennomføringa av turneringa.
Fotballkampane føregjekk på anlegga på Nymarksbanen.