Det er ikkje eit naust

Etter at Fylkes­mannen i Horda­land i vår tok den endelege avgjerda for naustet i Høiviki på Sletta, har kommunen no sendt ut pålegg om fjerning.

Og det er ikkje berre flisene og forbrenningstoalettet som må ut, heile hytta må fjernast slik at berre naustegrunnane står att.

Sidan eigaren først fjerna det gamle naustet og sette opp ei hytte, kan ikkje hytta tilbakeførast til nauststandard. Det er nemleg ikkje noko att av det opphavlege naustet, anna enn grunnane.

Før jul
Det som ein gong var eit vanleg naust, og som så vart ei hytte i sjøkanten med innreiing og fliselagt golv, må vekk før 20. desember. Straks hytteeigarane har etterlevd pålegget, skal dei gje melding til kommunen, som så vil komma på kontroll.

Vert ikkje kommunen sitt pålegg etterlevd, kjem det ei dagmulkt på 400 kroner på toppen.

Hytta har etter det Strilen kjenner til vore i bruk også i sommar.

Ulovleg
Rekninga kom kommunen har sendt ut no er på 40.000 kroner som eingangsmulkt, pluss 13.200 kroner i gebyr for det som heiter «oppfølgjande sakshandsaming av ulovleg byggearbeid».
Spørsmålet om hyttenaustet kan stå er endeleg avgjort av Fylkesmannen. Men vedtaket om mulkt og pålegget om fjerning kan likevel påklagast til kommunen, klagefristen går ut i september.

Terrasse
Saka har gått fleire rundar til politiske utval utan at eigarane har fått løyve til å ha hyttenaustet som det er i dag.
Den utradisjonelle innreiinga vart oppdaga i samband med at kommunen skulle taksera alle bygningar på øya, då eigedomsskatten vart innført for nokre år sidan.

Marmorskifer
Eit eldre naust er rive og ny bygning sett opp.

Innreiinga omfattar mellom anna marmorskifer på golvet, og panel i tak og vegger.

Langsmed eine langveggen, mot sjøen, er det laga til gangbru/terrasse, og i staden for vanlege naustdører i front er det sett inn skyvedør med glas.
I eit lite bygg attmed er det sett inn eit forbrenningstoalett.