Dette er ein havabbor

Fisken vart teken ved Rosnes på Radøy.

Me bad om tips frå lesarane om kva slags fisk dette kunne vera, og tipsa har ikkje lete venta på seg.

Dei aller fleste har slått fast at dette er ein havabbor (Dicentrarchus labrax).

– Dette er ein fisk som vert fanga stadig oftare på Vestlandet, skriv Erling Jacobsen.

– Dette skuldast at vasstemperaturen stadig vert høgare. Fisken er ein god matfisk som vert høgt skatta i varmare strok nedover i Europa.

At denne spreke krabaten er ein ekstra velkomen gjest blant sportsfiskarane, vert framheva av fleire. Det skuldast nok både at han gjev god motstand og at det er ein slik fortreffeleg matfisk.

Fisken lever i stimar og veks langsamt. Det vert likevel drive oppdrett av havabbor i store merder i Søreuropa.

Både hobbyfiskar Terje Pedersen og zoolog i Norsk natur informasjon, Arnold Håland nemner i sine svar at havabboren er funne som reproduserande fisk mellom anna i Masfjorden.

Terje Pedersen kjem til slutt med ei oppmoding om ikkje å fiska for hardt i dei områda der du får denne flotte fisken.

Og skulle det dukka opp fleire eksotiske gjestar i garn eller på kroken, er det berre å gje oss eit ord - og eit bilete.