E.coli-alarm i Nordbygda

Nordbygda-foreldra fekk i går nærare informasjon om E.coli-smitten av frå venstre Aslaug Sandvin frå Mattilsynet, turnuslege Denise Hagen, turnuslege og kommunelege Rolf Martin Tande.

– Prøvane er til analyse for å sjå om smitten er ein  del av den nasjonale stammen av bakteriar, som ein har prøvd å finna kor skriv seg frå i fleire år, uttalte kommunelege I Rolf Tande til Strilen på ein pressekonferanse ved 17.00-tida i går.
Tande opplyste at eit barn i barnehagen var sjukt og lagt inn på sjukehus i løpet av dei siste dagane.
Tande ønskte ikkje å gje media alder og kjønn på det sjukebarnet.
– Folkehelsa har lova eit svar om smitten i løpet av torsdag ettermiddag, opplyste Tande.  Svaret vil avklara om det vert aktuelt med avføringsprøvar av alle borna i barnehagen.

God informasjon
– Me har fått god informasjon hjå kommunen, seier faren som i går uttalte seg til Strilen, Thomas Sleire-Gjerde, etter at foreldra kom ut frå det ekstraordinære informasjonsmøtet.
Foreldra vart varsla om E.coli-smitten hjå eitt barn i barnehagen mellom klokka 12.00 og 13.00 i går.
– Som foreldre er me bedne om å følgja nøye med på borna våre. Men det er inga krisestemning, seier Sleire-Gjerde, som sjølv har ei jente på halvtanna år i barnehagen.
Ver obs på symptom
Det var Aslaug Sandvin ved Mattilsynet sitt kontor for Bergen og omland som i går stadfesta E.coli-smitte hjå eit barn i Nordbygda barnehage.
Ho deltok også på møtet med foreldra. Fagfolka i Mattilsynet vil intervjua foreldra i Nordbygda om kva borna deira  har ete i det siste og kor dei har vore, for å finna trådar som kan leia fram til smittekjelda.

Symptom

Når det gjeld symptom på E.coli-smitte, bør alle, og særleg born, koma seg raskt til lege dersom dei får blodig diaré. Dei første symptoma er ofte akutte magesmerter, deretter vanleg diaré og så blodig. Nyresjukdom (HUS) kan oppstå etter ei vekes tid, spesielt hjå born, som kan føra til nyresvikt og i verste fall død. Symptoma på HUS er bleikheit, utmatting, hudblødningar og nedsett urinmengde.
Her i landet har me tidlegare hatt større utbrot av E.coli-infeksjonar i 1999, 2003 og 2006. Eit nytt utbrot har kome i år, utan at smittekjelda så langt er påvist. Eit barn i Sogn og Fjordane har misst livet av smitten i år. Frå før er det registrert to dødsfall av såkalla EHEC-infeksjon i her i landet. Det eine barnet omkom i 2004, det andre i 2006.
I 2003 vart smittekjelda ikkje påvist. Utbrotet omfatta totalt fem born mellom eitt til fire år. I 2006 kom smitten frå morpølser produsert ved Gilde sitt anlegg Terina Sogndal.
I januar i år døydde ein toåring frå Nordfjordeid etter å ha vorte smitta av aggresiv E.coli-bakteriar.
I februar vart ei 11 år gammal jente frå Bergen innlagt på Haukeland Universitetssjukehus  med E.coli 0157-bakterien. Ho vart heilt frisk.
I mai fekk ei tenåringsjente frå Hordaland påvist den same bakterien. Då tilspissa styresmaktene jakta på bakterien, melde bt.no i går.