Etterlyser trygt fortau

– Å få denne stolen var veldig kjekt, no kan eg komma meg ut litt, seier Andreas Lillebø.
80-åringen er ikkje like sterk i beina som før, men med stolen kjører han like frå Alverstraumen til Knarvik.
– Bortsett frå denne betongkanten her er vegen inn til Knarvik bra no. Då er det dumt at det skal vera eit slik hinder her.
Hinderet han snakkar om er ein betongbjelke som skiller fortauet langs vegen og fortauet på brua. Bjelken stikk noko opp frå asfalten, nok til at den elektriske rullestolen gjer ein vipp.
– Dei er ikkje så stødige desse stolane her.

Nesten-velt
– Eg har vore nære på å velta her fleire gonger, seier Lillebø.
På grunn av kanten kan han ikkje kjøra på skrå over betongbjelken, men må kryssa på tvers. Då vert svingen for knapp, og stolen skrapar borti elementa som skil fortauet frå kjørefeltet over Alversundbrua.
– Det skulle vore lagt på litt oljegrus her, slik at fortauet på begge sider av bjelken kom i plan med den, seier Lillebø.
– Etter at den nye vegen frå Alverflaten til Isdal opna, er det ikkje noko problem for meg å komma meg til Knarvik. Men denne kanten her er ei plage.

Skal sjå på
Jarle Solibakke i Statens vegvesen si avdeling i Nordhordland lovar at vegstellet skal sjå nærare på fortauet som Lillebø har merknader til.
– Dette høyrest ut som noko som me må sjå nærare på, om det er noko me kan gjera noko med, seier Solibakke.
Kanten er elles ikkje berre eit problem for rullestolar, syklistar både på breie og smale dekk kan få seg ei overrasking der.
– Me må sjå nærare på dette, og diskutera litt med dei som har ansvaret for bruene, seier Solibakke, og viser til at det er ei brufuge like ved denne bjelken, fuga der «fastlandsdelen» møter sjølve hengjebrua.