Facebook-gruppe støttar Overå

Anten det no var Facebook-gruppa eller andre ting som låg bak, det var nesten full kyrkje til gudstenesta, som også omfatta ein barnedåp. Alt utanfor døra kunne ein sjå det sterke oppmøtet, med parkerte bilar alle vegar.

Til støtte
Facebook-gruppa med støtte til sokneprest Overå vart starta i førre veke, og heiter «Vi som ønsker å beholde Vilhelm Overå som prest». Dette er ei gruppe der dei som er medlemmar av nettsamfunnet Facebook kan verta medlemmer, og per i går var det 346 personar som var nettopp det.
– Eg starta gruppa i førre veke, som støtte for sokneprest Overå, seier Sigmund Grønnevik frå Hjelmås.
– At det er alt er så mange medlemmer i gruppa, tyder på at det ikkje berre eg som meiner dette.

Venta med dåp
Grønnevik vart i si tid konfirmert av Overå, og for nesten nøyaktig eit år sidan var Overå prest i bryllaupet hans. No har han og kona eit born som skal døypast, og det vil dei at Overå skal gjera.
– Det er sokneprest Overå som høyrer til Hjelmås kapell, og eg og kona er samde i at me skal ha Overå i dåpen, seier Grønnevik, som har fått tilbakemelding frå kyrkjekontoret om at dette ikkje går.
Sokneprest i Gulen, Jens Linde, er henta inn for å jobba halv stilling i Ostereidet sokn, og er ført opp på det som skulle vore Overås sine gudstenester på Hjelmås framover.
– Då må me utsetja dåpen eller finna ei anna løysing. Me skal ha Overå som prest, seier Grønnevik.

– Folkeleg
Grønnevik seier at han oppfattar Vilhelm Overå som ein folkeleg og god prest, som legg ting fram slik at alle kan forstå bodskapen.
– Sjølv om det er ein viktig bodskap, legg han det fram på ein måte som sjølv ein åtteåring kan forstå.
I tillegg nyttar Overå humor på ein god måte, meiner grunnleggjaren av støttegruppa på Facebook.
– Overå er ein grei prest som kan få folk til å le i kyrkja.
Grønnevik reknar med at gruppa på Facebook også vil munna ut i ein underskrifts-
kampanje.