Fekk målrosa for god språkbruk

– Eg må berre seia allslags takk på vegne av skulen. Dette var veldig overraskande og kjekt, sa rektor Inge Alver då han nærmast vart teken på senga med utmerkinga. Astrid Namtvedt Sylta ringte meg før helga og bad om eit møte, men ho sa ikkje kva det gjaldt, legg han til.

Fleire forslag
Alver fortel at det var under ei idémyldring blant personalet då nybygget skulle opnast at ideen om dei universelle namna dukka opp.
– Det kom fleire forslag som til dømes kjende personar og geografiske namn, men me enda opp med gamle, gode tostavingsord som beskriv typiske landskapsformer som var brukte på heile strilelandet, seier Alver.

På vrimleområda
Namna vert brukte på dei ulike vrimleområda på skulen og er plasserte slik at dei beskriv terrengforholda som flaten, høyen, leitet, brekko, vikje og renen.
Også det nye auditoriet, Knarren, har fått fleire namn. Rommet kan nemleg delast i to ved behov, og har såleis fått namna framskuten og bakskuten.
Om namnet Knarren, fortel Alver at det er oppattkalla etter ein spesielt type fraktebåt som vikingane brukte, ein knarr. Og vikje, er sjølvsagt gangen utanfor auditoriet.
Namna har dei valt å skriva på «normal» måte og ikkje dialekt.
– Me kunne sjølvsagt skrive dei på dialekt, men valte å normalisera dei fordi det trass alt ikkje berre går nordhordlendingar på denne skulen, seier Alver.

Tredje prisen
Prisen til Knarvik vidaregåande skule er den tredje Alversund Mållag har delt ut. Første prisen gjekk til Møre Konfeksjon for nynorsk annonsering. I fjor gjekk prisen til Lindås kommune for at dei brukte nynorsk i all kommunikasjon informasjon i samband med kongebesøket.