Fekk plassane dei ville ha

– Eg vart skikkeleg nervøs då eg ikkje kom inn på førstevalet mitt ved første opptak. Men ved andreopptaket denne veka fekk eg plass på Vg1 Studiespesialiserande ved Knarvik vidaregåande skule slik eg ville. Det var deilig å få vita, seier Siv Anne Fimland. Ho og Malene ferierer hjå mormor i Drammen når Strilen ringjer.

Vil jobba hardt
Femtenåringen som no bur i Knarvik, hadde U. Phil i Åsane som andreval, men der trur ho ikkje ho hadde passa inn. Difor er ho innstilt på å jobba hardt for å koma inn i Knarvik dei neste to åra også.
– Det hadde jo vore greitt å ha ei forsikring om å få gå tre år på same skule når eg først har kome inn. Men når det er slik det er, ser eg det som ei utfordring å jobba for å vera god nok til å koma inn dei neste to åra også, seier ho.
Programmet ho har valt, vil ho bruka til å studera vidare til psykolog eller grunnskulelærar.

Alle får

Ved 2. inntak til Hordaland fylkeskommune sine vidaregåande skular, har over 2000 søkjarar fått plass. Det betyr at av søkjarar med ungdomsrett*, er det no berre 240 som ikkje har fått tilbod om plass, og dei vil få det ved 3. inntaksomgang 13. august, skriv inntaksleiar Nils Skavhellen i ei pressemelding.

Les meir i Strilen si papirutgåve torsdag.