Forlangar hytter rivne

– Eg har ikkje særleg store forhåpningar, sa den nye hytteeigaren før plan- og miljøutvalet skulle behandla saka om hyttene som er oppførde utan byggeløyve ved Gjervågen på Rosnes nord for Lindås.

Han hadde møtt fram for å følgja handsaminga i utvalet, men vart kasta på gangen saman med resten av tilhøyrarane.

Og det viste seg at han hadde grunn til skepsis, for då utvalet opna dørene att og gjekk til avrøysting, vart det samrøystes vedteke å ikkje gje dispensasjon frå kommunen sin arealplan for nokon av hyttene. I klartekst vil det seia at dei må rivast viss ikkje eigaren får medhald på høgare hald.

Naust vart hytter
Som Strilen skreiv i laurdagsavisa, er ei hytte med to anneks oppført utan byggeløyve ved Gjervågen på Rosnes. Det einaste det har vorte gjeve løyve til, er eit naust. Hovud­hytta vart bygd i 1969, medan dei to anneksa vart bygde om lag 20 år seinare. Det vart og oppført eit tilbygg på hovudhytta i 2003. Samla er det snakk om bygg på 180 kvadratmeter.

Den nye eigarane overtok eige­dommen i 2006.

Eigaren seier til Strilen at han ikkje visste at hytta var oppført ulovleg då han kjøpte, men at han vart informert om at ikkje vart søkt om byggeløyve for anneksa. Han trudde likevel at det skulle gå i orden sidan, sidan hyttene var teikna inn på kommunen sine kart.

Store utlegg
Eigaren fortel at han mellom anna har lagt med 400.000 ­kroner for å føra straum fram til hovudhytta. Det er og gjort mykje for å pussa opp hyttene, investeringar som no kan vera bort­kasta.

Etter vedtaket i utvalet forlet mannen møtet, tydeleg skuffa, og ville ikkje kommentera utfallet nærmare.

Ikkje grunngje
Før utvalet fatta vedtak, fekk utvalet ei juridisk utgreiing bak lukka dører av jurist Benjamin Hicks, som er tilsett i Lindås kommune.

Då Strilen bad utvalsleiar Øystein R. Moldeklev om å få ei grunngjeving kvifor utvalet avslo dispensasjon, sa han berre at det kunne han ikkje, sidan saka var behandla bak lukka dører.

Rådmannen hadde tilrådd dispensasjon for hovudhytte med kai, men utvalet ville altså ikkje la nåde gå før rett, sjølv om hytta har stått i over 40 år. Saka går no vidare til Fylkesmannen, men hytteeigaren gjev uttrykk for at han ikkje har særleg store voner om medhald der.