Formannskap for fleirbrukshall

I møtet torsdag sist veke var det fleire som i starten snakka om at denne saka ikkje var godt nok utgreidd, og at spørsmålet heller burde utsetjast til eit seinare møte.

I staden enda det med samrøystes støtte til vedtaket om å auka den kommunale delen av kostnaden med 4,4 millionar kroner, pengar som skal hentast frå disposisjonsfondet.

Fire millionar av dette er til sjølve hallen, 400.000 kroner er til bygget som skal husa fotballgarderobar for utandørs baner. Kommunen sin del er oppe i 16,4 millionar.
Fleirbrukshallen skal kosta kring 40 millionar kroner, og skal i tillegg til sjølve hallen romma garerobar, tribune, styrkerom, sosialt rom, klatrevegg, råbygg for bowlinghall, foajé/aktivitetsrom, kontor og kjøkken.

Saka skal opp til endeleg avgjerd i kommunestyret torsdag 16. september.

Ville kutta meir
– Eg saknar ei vurdering frå administrasjonen på korleis ein skal finna dei siste fire av 40 millionar kroner, sa varaordførar Bjarte Vatnøy (Frp) i starten av møtet
Varaordføraren lurte på om det var mogleg å kutta noko i asfaltering og uteplantar, for å få ned prisen.
Den tanken vart teken til jorda av assisterande rådmann Kåre Jordal, som kunne opplysa om at fleire ting alt er teke ut av prosjektet for å få prisen ned.

– Sist var det 8,5 millionar som stod att utan finansiering, no er det 4 millionar kroner, sa Jordal i formannskapet.

Politikarane gjekk inn for å dekka resten, og tok også restkostnaden til utandørs fotballgarderobar.

Spara på skule
Ordførar Astrid Aarhus Byrknes peika på at ei realisering av hallen kan redusera trongen for utbygging ved Lindås barneskule, ved at ein kan bygga om eksisterande gymsal der til andre føremål.
– Her må det vera ein gevinst både for idrettsparken og skulane og elevane, sa Aarhus Byrknes.
Administrasjonen opplyste at ein i løpet av september skal vera klar med eit romprogram for den utbygde skulen.
Det vart sagt at arealet i gymsalen kan erstatta nybygg.

Kommunen største
Lindås kommune vert den største bidragsytaren til å få sjølve hallen opp, med i alt seksten millionar kroner.
I tillegg kjem spelemidlar, og sponsorstøtte frå fleire eksterne støttespelarar. Desse skal etter planen presenterast seinare.
Fullt namn på prosjektet er elles Lindås idretts- og kulturpark.