– Den beste sommarjobben

– Eg vart så glad at eg nesten skreik då eg takka dama som ringte og sa at eg hadde fått jobben, seier John Nicko Lampe, med Hannah (4 1/2) på armen.

John Nicko og Roy Emanuel Angelo Eish har hatt sommarjobb i Marihøna barnehage dei siste tre vekene.

Hannah berre fnisar blidt på spørsmål om det er kjekt at store gutar passar på ho.

Mange søkjarar

Rundt 50 ungdommar skal ha søkt på sommarjobben som vart lyst ut for elevar ved Meland ungdomsskule. Fire fekk intervju, men så var det altså bestekompisane John Nicko og Roy Emanuel som fekk jobba saman.

– Barnehage må vera den beste jobben ein kan ha om sommaren, meiner Roy Emanuel.

– Bleieskift var det einaste eg kvidde meg litt til, men det går heilt greitt. Det er jo ein del av jobben, det, seier John Nicko.

Konfliktløysing

– Det er gøy, det er godt betalt og me får vera ute og leika med borna, seier John Nicko.

Begge har passa born i familien før, men dei har ikkje måtta skifta bleie eller løysa opp i barnekranglar før.

– Det var ei utfordring å skulla ordna opp mellom to born som for eksempel krangla om ein leike når du ikkje veit kven som hadde leiken først. Men då må me visa dei at det er kjekt og viktig å kunna dela på ting, seier Roy Emanuel.

Vil til Nordsjøen

Denne veka var siste veka, så no gler ungdommane seg til litt ferie før dei skal begynna på Teknisk og industriell produksjon (TIP-linja) ved Knarvik vidaregåande skule.

Så de skal ikkje jobba i barnehage, altså?

«Nei», gliser dei og nemner Nordsjøen.

– Men det har vore ein god erfaring, seier Roy Emmanuel.