Intim jazzfest på Fedje

– Eg elskar å spela på slike små intime plassar på bygda, seier ho når ho ringjer og spør Strilen pent om me kan skriva nokre ord om henne før konserten.

Noko for seg sjølv

Rita Lovise Haugseggen er ein songar og låtskrivar som formidlar sterke opplevingar og kjensler gjennom spennande akkordprogresjonar, gjennomarbeidd lyrikk og samanvevande melodiføring.

Hennar særeigne stemme og originale musikalske uttrykk, gjer at folk får kjensla av å oppleva noko så sjeldan som ein mogleg ny retning innan musikk.

Det er som å høyra Leonard Cohen, Radka Toneff, Adele, Tori Amos, Nina Simone, Robert Plant, Judy Garland, PJ Harvey, Melody Gordot, Grace Jones og Tom Waits på ein gong.

Veldig mange bruker difor uttrykket «ein ny sjanger» om musikken hennar, noko artisten sjølv synest er heilt fantastisk.

 Smeltar ekspertane

Ifølgje Festspillene i Nord-Noreg, er Rita Lovise «en av de mest spennende jazzartistene vi har i dag». Til og med NRK sin jazzekspert Erling Wicklund klarte ho å smelta.

Rita Lovise blei nyleg også tildelt Festspillenes Turnéstipend for 2012.

Det siste året har ho turnert store deler av landet med song, gitar og berre eige låtmateriale.

Turneen som ho kallar «Rita Lovise - Jazz in a new coat?» er blitt svært godt mottatt av både publikum og presse.

Ifølgje heimesida hennar, har ho også planar om plate i løpet av året.

Tidleg ute

Med musikalske årer frå farssida, og ei kunstnarisk mor som tidleg oppdaga songtalentet hennar, bar det opp på scena som seksåring. Ho tok orgeltimar som sjuåring, og i åtteårsalderen blei det korøvingar og musikkteori og solistopptreden. 

Å skriva eigen musikk, starta ho med allereie i 14-årsalderen.

Kjem att neste år

Til hausten legg ho ut på ein nye turné kalla «Craving Coffee» med band. Då har ho med seg Bjørn Andor Drage (tangentar), Finn Sletten (perkusjon), Henning Gravrok (saksofon) og Bjørn Alterhaug (kontrabass). Desse framragande musikarane og Rita sitt særeigne musikalske uttrykk, gir publikum grunn til å forventa det uventa.

Denne turneen vert støtta av Norsk Jazzforum, Nordnorsk Jazzsenter og Festspela i Nord-Norge.

I 2013 planlegg ho bandturné også i Hordaland, så lurer du på om det er noko som er verdt å venta på, er det jo berre å ta seg ein tur til Fedje på laurdag.