Ny rekord for Utkant

Over 6.700 festivaldøgn vart selde på årets Utkant-festival. Det er 500 fleire døgn enn i fjor, og festivalen har fått ein omsetnad som nærmar seg to millionar kroner.
– Kontrastane sin festival, seier festivalsjef Viggo Randal, med tanke på at veret fredagen var heilt krise, medan laurdagen baud på det finaste festivalver ein kan tenkja seg.

Randal sin nære arrangørkollega Njål Wilberg kallar årets Utkant for «tidenes festival», det vil seia at dette var festivalen der omtrent alt gjekk som det skulle.
– Eg må berre konstatera at arrangementet i år var strøkent, og det har ikkje vore tilfelle kvart år på tidlegare festivalar. At me kom så godt ut av det, skuldast at me har vorte meir røynde og at me har ein veldig fin gjeng med mange frivillige medarbeidarar som stiller opp, seier Wilberg.

Folk og økonomi
Dei rundt 6.700 festivaldøgna spreidde seg utover dei tre festivaldagane slik at det vart ei stiging i publikumsmengda fram mot laurdag. På denne toppdagen vart det registrert over 2.600 festivalgjester. Det gode publikumstalet fortel at det også har begynt å verta økonomi i Utkant-festivalen.
Enno har slett ikkje alle rekningar kome inn, men arrangørane forventar eit lite overskot etter ein omsetnad som vil liggja ein stad mellom 1,8 og to millionar kroner.
Dei føregåande åra har festivalen gått sånn nokolunde i balanse, medan startåret gav eit litt stygt underskot som arrangørane sidan har bore med seg.

Er letta no
– Me er ei letta festivalleiing, fordi me har kome så godt ned med begge beina, seier festivalsjefen.
Han meiner at det som føregjekk ute i havgapet i helga var «tidenes fest» i Nordhordland, sjølv om Skjerjehamn høyrer til i Sogn. Mange av dei som kjem til Utkant, er båtfolk som høyrer til på strekninga frå Bergen til Florø, og så innover i Sognefjorden. Det ser også ut til å vera båtfolket som sørgjer for det meste av publikumsauken.
– Elles hadde me ein ferierande tyskar her med bubil som heldt til hjå oss under heile festivalen, og han syntest at dette var den finaste festivalen han nokon gong hadde vore med på, fortel Viggo Randal.

Stadig forbetring
Han seier at festivalleiinga heile tida jobbar med å forbetra seg, og det gjer dei ved å notera ned alle detaljar dei ikkje måtte vera nøgde med. Elles er det lett for å gløyma, og berre minnast dei gode tinga.
– Eg må berre seia at eg synest me hadde ein veldig fin flyt i programmet i år. Me prøver alltid å komponera eit musikalsk program frå ulike sjangrar som skal passa i hop, på eit vis som totalt sett skapar ei god stemning i løpet av festivalen. Det meiner me at me klarte, seier festivalsjefen.