På eige Bruce-cruise

Det er tysdag ettermiddag på Hundvinkaien. Inn fjorden kjem skyssbåten Tornerose medan kaien fyllest opp av folk frå Bruvoll, Træland og Hundvinsfeltet.

Ja, til og med ei handfull lindåsingar har forvilla seg innover i bygda.

Trælandsgjengen imponerer

– Nei, e de komne alt? spør folk overraska når Trælandsgjengen dukkar opp.

Kjende for alltid å vera seint ute, har dei fått beskjed om å koma halv fire, men imponerer stort med å koma ti på.

– Har du ikkje Marit med deg?

– Nei, ho ligg heima og spyr, seier Christian.

Men kor e Rune?

– Rune då?

– Har noko sett Rune? Skulle han koma på her eller i Nøtlevågen?

Kan nokon ringja han? ropar Atle Andersen og leitar febrilsk etter namnelista i ferjebillettøruniforma han har pynta seg med i høve turen.

– Den skal dei på båten ha. Eg må skriva opp deg òg, forklarer han og stiller seg ved landgangen.

– Kven er det som alt har gått om bord?

– Toril, Henrik og Janne, trur eg, svarer Sverre Skeidsvoll.

– Okei, då kan resten koma. Kom igjen, då!!! ropar Atle og vinkar folk om bord kjent billettørpositur.

Men å ha billett til båten er ein ting. Noko anna er å ha konsertbillett.

Fleire var med berre for turen si skuld og skulle fint klara å ha det kjekt medan dei andre var på konsert, fekk me vita.

Planlagt i mai

Atle fortel at det var han og Arne Olav Halland som tidleg i mai ein gong fekk ideen med å leiga skyssbåt.

– Me oppdaga at det var så mange me kjende som hadde fått billett til ekstrakonserten i dag og tenkte det hadde vore moro å reist i lag, forklarer dei.

Først fekk dei ein god pris hjå eitt båtselskap. Men like etter at dei hadde sendt ut invitasjonar på e-post til heile halve bygda, ringte selskapet og beklaga at prisen dei hadde fått berre var ein veg.

Forklaringa var at det var ein sommarvikar som hadde gitt dei prisen, men dei kunne pynta på fadesen med å slå av 2000 kroner.

– Det var jo ikkje ti prosent i rabatt ein gong, så me takka nei til heile sulamitten og ringte Tornerose i staden for, seier dei.

Om Nøtlevågen

Med alle om bord går kursen om Lurekalven til Nøtlevågen. Der skal eit knippe radværingar også vera med til byn.

Frå høgtalarane strøymer Bruce Springsteen, nabopraten går livleg og alle har det godt.

– Dette synest eg me skal gjera kvar helg, føreslår Bent-Arne Rognaldsen. Ingen er ueinige i det.

– No må de hugsa at båten går heim att klokka halv tolv, ropar båtdama etter oss.