– Prisverdig arbeid i Radøy

– Tilsynsrapportane frå campingplassane på Radøy var ikkje akkurat oppløftande lesing, men det er kjempeflott at Radøy går så grundig til verks. Det er prisverdig arbeid, og me skulle ønskja at fleire gjorde det same, seier Arve Meidell, beredskapssjef hjå Fylkesmannen.

Skal laga ein rettleiar
Fylkesmannen er i ferd med å samla aktørar som kommunane, mattilsynet, skatteetaten, brannvesen og andre, til å laga ein rettleiar til regelverket som gjeld på campingplassar.

– Våre folk tenkjer først og fremst brann og branntryggleik, men dette gjeld jo fleire fagområde. Det er gjerne så som så kvar gråvatnet ender, og det har med smittefare og folkehelse å gjera. Me håper at ein rettleiar kan gjera det enklare både for brukarar, campingeigarar og kommunar å halda seg til regelverket, seier Meidell.

– Målsetjinga er ikkje å «ta nokon». Me har heller ikkje ønskje om at nokon skal avvikla. Campingplassar er effektiv arealbruk, men me må tenkja tryggleik og sørgja for at ein driv i ordna former, seier Meidell.
 
Brann med stor smittefare
Han undrar seg over at dei som brukar campingplassane ikkje er meir merksame på kva som kan skje om det brenn.

– Eg ville jo ikkje sjølv hatt vogn på ein campingplass der vogner, spikartelt og terrassar stod så tett saman. Ei campingvogn vert veldig fort overtent og faren for at brannen smittar er stor, seier fylkesberedskapssjefen.

Han meiner tilhøva på Radøy ikkje er eit unntak frå korleis ein driv campingplassar andre stader. Folk må vera særskild merksame på risikoen med å ha mange kilo propangass samla på ein campingplass.

– Då bør ein i alle fall vita kva ein gjer om noko skulle skje, seier Meidell.

Bilde til denne artikkelen er henta frå ein film som Norsk brannvernforening har laga for å visa brann i ei campingvogn.

FAKTA: Dette er saka

* Radøy kommune avdekka fleire avvik frå regelverket på Vågenes camping, Havgård fjordferie og Radøytunet camping i mai.

* Avvika gjeld branntryggleik, tal på campingeiningar, avløp og kloakk, påkopling kommunalt vatn og meir. Kommunen tek atterhald om feil.

* Tilsynsrapportane, som var eit førehandsvarsel om tiltak til campingeigarane, har fått to av campingeigarane til å snakka om avvikling av drifta.

* Fylkesmannen vil bruka Radøy sine erfaringar til å utarbeide ei rettleiar for heile Hordaland. Oppfattinga til alle Strilen har snakka med er at tilhøva på Radøy ikkje er verre enn andre stader.

I dag, torsdag har Radøy kommune kalla inn til pressekonferanse ang. rapporten om campingplassane