Smell ved Krossnessundbrua

Ein personbil fekk eit ublidt møte med ein lastebil, då personbilen svinga ut på hovudvegen frå Ådlandsvegen, like ved Krossnessundbrua, måndag ettermiddag. Helsepersonell, brannvesen og politi var på staden kort tid etter at ulukka vart meld i 14-tida.

Ei kvinne og ein mann, som sat i personbilen, fekk tilsyn av helsepersonell ved ulukkesstaden, men skadeomfanget var enno ikkje avklart måndag i 15.30-tida.

– Det er truleg snakk om lettare personskader. To personar er i alle fall sende til sjukehus for sjekk, seier politioverbetjent Svein Hatlevik ved Nordhordland lensmannsdistrikt.

Lastebilsjåføren er ikkje vera fysisk skada, ifølgje politiet.

– Dette er andre ulukka me er på berre i dag, og me oppe i åtte eller ni trafikkulukker på litt over ei veke i Nordhordland, sukkar politioverbetjent Hatlevik.

– Det som er fantastisk å sjå, er det apparatet me har som kjem så raskt i sving etter ei ulukke. Her er alle på plass med ein gong, og dei som treng hjelp får hjelp. Det er godt å sjå, seier han.