Fryktar forgubbing utan einebustader

– Me er ein familie på fire som bur i ein tomannsbustad på 135 rutemeter. Men ønsket er å bu vidare i Knarvik eller i nærleiken i ein einebustad med hage. Får me ikkje det, kan me like godt flytta til ein annan kommune, seier Alexander Kittang.

Han gler seg over stadig fleire medlemmer i Facebook-gruppa som krev nye tomter for einebustad i Knarvik.

Tysdag kveld var talet 149. Den siste kom inn medan Strilen snakka med Kittang på telefon.

Få einebustader til sals
«På finn.no er det massevis av leilegheiter til sals i Knarvik, men veldig få einebustader, skriv Kittang på den ferske Facebook-gruppa.

– Kommunen klør seg i hovudet over minkande elevtal til barneskulen. Og det er jo ikkje så rart når kommunen ikkje stiller opp med tomter for einebustader, seier Hildegunn Anundsen til Strilen.

Ho og familien er busette i leilegheit i Juvikstølen, men på jakt etter einebustadtomt, og har meldt seg inn i gruppa.

«Me kan risikera at barnefamiliar flyttar bort frå Knarvik for å få tilgang på tomtar og einebustader før borna startar på skule. Sjå berre på Bruvegen i Knarvik, kor mange barnefamiliar vert buande i dei rekkjehusa over lengre tid?», skriv Anund­sen i ein kommentar på Face­book-gruppa.

Hadde gjeve opp
– No vurderer me å flytta til Stavanger, der mannen kjem frå. Men eg er oppvaksen i Knarvik og kunne tenkt meg å bu her. Men før planutvalet sitt siste vedtak kom, hadde me heilt gjeve opp å få tak i einebustad, seier Anundsen til Strilen.

Anundsen og mannen vurderte tidlegare å søkja om tomt for einebustad i Juvikstølen.

– Men då var me under utdanning og hadde ikkje økonomi til å byggja innan fristen på to år. Som studentar slo me oss til ro med leilegheit. Det var planlagt 40 tomter for einebustader i Knarvik Aust, og me ville søkja der, seier Anundsen. Men så gjekk kommunen bort frå dei planane.

– Ta eit standpunkt!
Anundsen og Kittang synest Walde Bygg i for stor grad kjempar for ei tett utnytting med leilegheiter.

– Dei har også ei økonomisk interesse av at det vert mange leilegheiter, meiner Hildegunn Anundsen og Alexander Kittang.

Kittang seier at då planutvalet snudde til fordel for fleire einebustader, var det berre å «snu seg rundt».

– Responsen på Facebook viser den store støtta dette kravet har. Både eg og andre vurderer no å skriva brev til kommunen. Det Hildegunn Anundsen skriv på Facebook er viktig: Alle som bur i kommunesenteret, bør ta eit standpunkt til kva Knarvik dei vil ha i framtida, seier Kittang.

Prisantyding 1.490.000
Elles vart det nyleg lyst ut for sal ei einebustadtomt i Litlevika i Knarvik, storleik 822 kvadratmeter og «med flott utsikt» ifølgje kunngjeringa. Prisantyding er 1.490.000 + omkostingar.

Innan i går føremiddag hadde det ikkje kome bod på tomta, får Strilen opplyst hjå Eiendoms­megler Vest i Knarvik.