Ingrid Ryland får landslagssjanse

Lise Klaveness frå Frekhaug er tilbake på landslaget etter at Eli Landsem tok over etter Bjarne Berntsen.
No har også ei anna jente frå Nordhordland fått ein plass mellom dei beste i landet,
Ingrid Ryland (20) er nemleg teken ut til troppen som møter Kina og England i januar.

Privatlandskampar
Dette er to privatlandskampar, som skal spelast medan kvinnelandslaget er på treningsleir på La Manga. Treningsopphaldet går frå 12. til 17. januar, med kamp mot Kina 13. januar, og England 15. januar.
Lise Klaveness (28) har 53 landskampar og seks mål, medan statistikken så langt er blank for Ingrid Ryland.

Gripa sjansen
Til Bergens Tidende seier Ryland at ho skal gripa denne sjansen.
– Sjølvsagt er det eit mål å verta teken med vidare. Eg er ikkje med berre for å vera med. Denne sjansen skal eg ikkje la gå frå meg, seier Ryland til Bergens Tidende.  Tidlegare har ho spelt for Austrheim og Åsane, i dag spelar ho høgreback for Arna/Bjørnar.
Lise Klaveness spelar midtbane og spiss for Stabæk, og har nyleg forlenga avtalen med klubben. Ho har tidlegare spelt for Kvernbit, Sandviken, Arna-Bjørnar, Athene Moss, Asker og Umeå.