Inspeksjon i Sløvåg torsdag

Etter alt medie-oppstyret rundt brenning av avfall hos Wergeland-Halsvik i januar, var folk frå KLIF (Klima og forurensingsdirektoratet) på inspeksjon i Sløvåg torsdag.

– Ut frå det som har kome fram i rapportane frå Wergeland-Halsvik og Alexela Sløvåg, ser det ikkje ut som det har skjedd noko ulovleg i samband med brenninga, men me ønskte ein inspeksjon for å fastslå dette, sa seksjonssjef Bjørn Bjørnstad i KLIF til Strilen torsdag. I går var han ikkje tilgjengeleg for kommentar.

Burde varsla
Men sjølv om det så langt ikkje ser ut til at det er gjort noko ulovleg, meiner Bjørn-stad at KLIF burde vore varsla om brenninga før ho vart sett i verk.

– Ut frå kor betent denne saka har vore og alt medieoppstyret som har vore rundt desse verksemdene, hadde det vore klokast å varsla oss først, seier Bjørnstad.

Vil ha retting
Som me skreiv torsdag, har Alexela Sløvåg gjennom sin advokat forlanga at NRK skal gå ut og retta opplysingar dei har gått ut med dei siste dagane. Dei hadde forlanga svar innan onsdag.

– NRK har svara at dei ikkje har noko å retta opp, men me slår oss ikkje til ro med det. Me har sendt eit nytt brev, der me har utdjupa kva me vil ha korrigert, seier advokat Erik Myhr Nilsen til Strilen.

Myhr Nilsen trekkjer fram tre tilhøve som dei vil ha retta opp. Det eine er at brenninga var ulovleg. Det andre er at Alexela Sløvåg var pålagt å senda alt avfallet ut av landet, og det tredje er at det var eksplosjonsavfall etter Vest Tank-brannen som vart brent i Sløvåg.

– Det vart sendt ut av landet i 2008, seier Myhr Nilsen.