Kan få sikker plass på tinget

– Men det er langt fram, og eg reknar med å få konkurranse om 4. plassen. Og kjem eg ikkje inn på tinget, går ikkje verda under av den grunn, det kan eg forsikra!
Det seier Tveiten, som i Bergensavisen i går er omtalt som «Radøy-broiler på sikker Frp-plass».

Å verta kalla politisk broiler kan han ikkje gjera så mykje med, men 23-åringen meiner han har vore med såpass lenge at BA kunne funne eit anna uttrykk.

På utspørjing
– Eg ser at politikarar på same alder i Ap unngår å verta kalla broilerar. Men det får så vera, seier Tveiten. Han viser til at han har sju-åtte år bak seg i politisk arbeid.
For tida er han medlem i formannskapet på Radøy og i FpU sitt sentralstyre.

Det er blant anna etter utspørjing i nominasjonskommitéen at den unge radværingen, barnebarn av den kjende Ap-politikaren Martin Tveiten, er føreslått på ein 4. plass på den førebels lista.

Dermed er han framfor meir kjende folk som Torkil Åmland, Laila Reiertsen og Austevoll-ordførar Helge Andre Njaastad.

Ikkje planlagt
– Eg følte at eg svarte bra for meg, og sat ikkje fast på nokon av spørsmåla frå nominasjonskommitéen. Eg måtte også grunngje standpunkta mine i ulike saker, seier Tveiten.

– Trass ung alder har Tveiten god politisk og organisatorisk erfaring, seier leiaren i noninasjonskommitéen, Liv Røssland, til BA.

For tida har Tveiten inntekta si frå jobb ved brannstasjonen på Haakonsvern, pluss nokre ledige timar i Radøy Steinindustri, som broren driv.

Å koma på sikker på plass på Frp-lista for Hordaland er langt frå planlagt. Eg har hatt som utgangspunkt å ta vidare utdanning, innan politi eller sjukepleie, seier Tveiten. Skulle han få 4. plassen har han ikkje noko mot å følgja i Gjermund Hagesæter sine fotspor inn på Tinget. Lindås-strilen er førebels føreslått på 2. plass etter Arne Sortevik, og med Karin Woldseth frå Bergen på 2. Plass.

– Sist var me nær det 4. mandatet med kring 26 prosent av stemmene i Hordaland. Så etter dagens måling kan ein 4. plass vera sikker. Men det er langt fram i prosessen, seier Tveiten.

Den førebels lista skal ut til alle partilaga. Så skal nominasjonsnemnda koma med eit endeleg forslag, som skal avklarast på nominasjonsmøtet i desember.

I dei andre partia ser det så langt ikkje ut for at nokon frå Nordhordland får sikker plass.