Knarvik-resultat langt over snittet

– Me har flinke elevar og eit sterkt og blomstrande læringsmiljø, seier rektor Inge Alver som forklaring på at elevane på Knarvik vidaregåande har gjort det så godt i år.
Alver er intervjua i fylkeskommunen si internavis.
Og Alver sine påstandar vert underbygd av statistikk. Gjennomsnittskarakteren for dei som kom opp til eksamen i vår, er 3,66 ved Knarvik vidaregåande. Tilsvarande tal for heile landet er 3,14. Det er ein svært markant forskjell.

Gode i norsk
Rektor var på ferie då Strilen tok kontakt med skulen, men også assisterande rektor Svein Ellingsen stadfestar at dei har grunn til å vera nøgde med resultatet.
– I rettslære hadde me snitt på 4,2, medan gjennomsnittet er 3,3, fortel han.
Både i norsk hovudmål og sidemål ligg resultatet ved Knarvik vidaregåande 0,4 over landsgjennomsnittet. Når det gjeld standpunktkarakterane, viser dei eit snitt på 4,08 på skulen i Knarvik. Det er også svært bra. Det plasserer skulen på ti på topp-lista i fylket, seier Svein Kirkevik ved Opplæringsavdelinga i fylket.
Av linjer som kan visa til spesielt gode resultat i år, viser Alver til studiespesialisering, elektro, design og TIP.

Ikkje reine seksarar
– Ja, me har mange gode enkeltresultat, sjølv om me ikkje har nokon med så mange seksarar at dei vil hamna på framsida i avisene, stadfestar Ellingsen.
Det har ikkje lukkast Strilen å få resultata frå Austrheim vidaregåande skule.
Dei endelege resultata frå kvar enkelt skule vert først offentleggjorde i august.

Hordaland på snitt
Førebelse tal frå Utdanningsdirektoratet viser at eksamensresultata i Hordaland ligg om lag på landsgjennomsnittet, medan elevane i Sogn og Fjordane ligg litt over. Ifølgje Aftenposten var det på landsbasis mest stryk ved eksamen i spansk og matematikk, heile 17 prosent. Også tysk, engelsk for yrkesfag, fysikk og kjemi hadde strykprosent på over ti prosent.
Lågast strykprosent av det i historie og filosofi med 4,8 prosent og i faget medie- og informasjonskunnskap med 4,2 prosent.