Meland-møte om idrettsanlegg

Her vil det spesielt verta sett fokus på den såkalla «Askøy-modellen» som kort går ut på at kommunen har oppretta eit eige kommunalt føretak som planlegg, byggjer, driftar og held vedlike alle nærmiljø- og idrettsanlegg i kommunen. Finansieringa av føretaket er fordelt på kommunen og idrettslaga.
Meland idrettsråd har difor invitert personar som har stått sentralt i prosessen med å utvikla Askøy-modellen. Dei som vil delta frå Askøy er Geirulf Mikkelsen som er dagleg leiar av Askøyhallene, og Sverre Jokstad som er rådgjevar for idrett og nærmiljøanlegg. Desse to vil gjera greie for korleis modellen verkar.
På møtet vil organisasjonssjefen i Hordaland Idrettskrets, Knut Songve, og nestleiaren i krinsen, Helge Johnsen, delta og gje innspel.
Leiaren i Meland idrettsråd, Bjørn Tore Hesjedal, seier at han håper på ein god og konstruktiv diskusjon. Han ønskjer lokalpolitikarar, folk frå kommuneadministrasjonen, idrettsleiarar, foreldre og utøvarar hjarteleg velkomne.
Meland kommune har ikkje ein einsarta driftingsmodell for slike anlegg. Nokre av dei er i privat eige, medan nokre er kommunalt eigd.