Krev svar etter NRK-oppslag om brenning

– Dei to bedriftene er bedne om å gje ei forklaring innan tysdag, seier seksjonssjef Bjørn Bjørnstad i Klima- og forureiningsdirektoratet (KLIF), tidlegare SFT.

Bjørnstad viser til oppslag i NRK om at Wergeland-Halsvik skal ha brent avfall frå Alexela som skulle til destruksjon i Tyskland.

– KLIF er ikkje kjent med at Wergeland har mottatt avfall frå Alexela i vinter. Men samtidig har Wergeland løyve til å ta imot og brenna farleg avfall. Brenning kan vera den miljømessig beste løysinga, men me hadde venta å verta orienterte om det skulle skje brenning i staden for ­transport til Tyskland, seier Bjørnstad.

Ordføraren avventar
Også Gulen-ordføraren krev svar etter at Wergeland-Halsvik har brent kring 60 tonn oljeavfall.

– Eg bad fredag KLIF kontrollera om Wergeland-Halsvik hadde løyve til å brenna avfallet. Så langt har ikkje kommunelege 1 fått melding om helseplager som kan knytast opp mot brenninga, seier ordførar Trude Brosvik.

Det vert stadfesta av kommunelege I Tommy Normann:

– Om andre legar er kontakta, veit eg ikkje. Etter at NRK gjekk ut med påstand om sjukemeldingar, har eg kontakta Yrkes­medi­sinsk Institutt ved Hauke­land Universitetssjukehus og bede dei vurdera å undersøkja. Dei har ansvaret for helseundersøkinga etter Vest Tank-ulukka, seier Normann.

«Stemmer ikkje»
«For tre veker sidan vart det sendt ut pressemelding om at alt resterande oljeavfall på Alexela Sløvåg sine tankar var sendt ut av landet med tankbåt. Men det stemmer ikkje», skriv NRK Sogn og Fjordane på si nettside.

– Me får berre sjå kva forklaring dei to bedriftene kjem med. Når det gjeld avfallet som Alexela skulle senda til Tyskland, var det eksportlisens på det. Kor mykje avfall som er sendt, vil me få opplysningar om via tyske styresmakter, seier seksjonsleiar Bjørnstad i KLIF.